చాలా కాలంగా సినిమాలకు దూరంగా ఉన్న బాలీవుడ్ నటి ప్రీతి జింటా మరోసారి వెండితెరపై సందడి చేసేందుకు సిద్ధమయ్యారు. కొంతకాలం విరామం తర్వాత ఆమె ‘వైబ్’ అనే యాక్షన్ కామెడీ చిత్రంతో పాటు ‘బట్వారా 1947’తో ప్రేక్షకుల ముందుకు రానున్నారు. ‘వైబ్’లో ప్రీతి జింటా ‘మేడమ్ హెచ్’ అనే శక్తివంతమైన సూపర్ స్పై పాత్రలో కనిపించనున్నారు. వంశిక ధీర్, కునాల్ ఖేము, స్పర్ష్ శ్రీవాస్తవ తదితరులు కీలక పాత్రల్లో నటించిన ఈ సినిమా సెప్టెంబర్ 18న విడుదల కానుంది.
ప్రస్తుతం చిత్రబృందం ప్రమోషన్ కార్యక్రమాల్లో బిజీగా ఉంది. ఈ సందర్భంగా నటి వంశిక ధీర్ తన అనుభవాన్ని పంచుకున్నారు. పెద్ద తెరపై తనను తాను చూసుకున్న సమయంలో ‘ఇంపాస్టర్ సిండ్రోమ్’ లాంటి భావన కలిగిందని ఆమె తెలిపారు.
వంశిక వ్యాఖ్యలకు ప్రీతి జింటా స్పందిస్తూ ఆసక్తికర విషయాలను వెల్లడించారు. ఎన్నో ఏళ్లుగా సినీ రంగంలో కొనసాగుతున్నప్పటికీ, ప్రతి కొత్త పాత్రను అంగీకరించినప్పుడు తనలోనూ ఇలాంటి సందేహాలు కలుగుతాయని చెప్పారు. కొత్త పాత్రను తాను సరిగ్గా చేయగలనా? లేదా? అనే ఆలోచన అప్పుడప్పుడూ వెంటాడుతుందని పేర్కొన్నారు.
అంతేకాదు, తన సినిమాలను తెరపై చూడటం తనకు అంత సులభం కాదని ప్రీతి తెలిపారు. థియేటర్లో కూర్చొని తన సినిమా చూస్తున్న సమయంలో సన్నివేశాలను ఆస్వాదించడం కంటే, తాను ఇంకా మెరుగ్గా నటించి ఉండాల్సిందేమోననే ఆలోచనలు ఎక్కువగా వస్తాయని చెప్పారు. ప్రతి సీన్ను తిరిగి విశ్లేషించుకుంటూ ఉంటానని ఆమె వెల్లడించారు.
సినిమా రంగంలో ఎన్నో సంవత్సరాల అనుభవం ఉన్న నటీనటులకు కూడా కొత్త పాత్రల విషయంలో ఇలాంటి సందేహాలు ఉండటం సహజమేనని ప్రీతి జింటా వ్యాఖ్యలు స్పష్టం చేస్తున్నాయి. ప్రస్తుతం ఆమె రీఎంట్రీ చిత్రాలపై ప్రేక్షకుల్లో ఆసక్తి నెలకొంది.
also read: సెలవు రోజు విషాదం.. కాలువలో మునిగి ఇద్దరు విద్యార్థుల మృతి