బంగాళాఖాతంలో ఏర్పడిన వాయుగుండం బలపడి ‘అక్వాన్’ తుఫాన్గా రూపాంతరం చెందింది. దీని ప్రభావంతో ఈ నెల 20 నుంచి 22 వరకు తెలంగాణలోని పలు జిల్లాల్లో వర్షాలు కురిసే అవకాశం ఉందని భారత వాతావరణ శాఖ (IMD) వెల్లడించింది. ముఖ్యంగా నవంబర్ 21వ తేదీన పలు జిల్లాల్లో ఉరుములు, మెరుపులు, ఈదురుగాలులతో కూడిన భారీ నుంచి అతి భారీ వర్షాలు పడే సూచనలు ఉన్నాయని వాతావరణ శాఖ హెచ్చరించింది.
తుఫాన్ ప్రభావం నేపథ్యంలో ఖమ్మం, భద్రాద్రి కొత్తగూడెం, సూర్యాపేట, మహబూబాబాద్ జిల్లాలకు ఆరెంజ్ అలర్ట్ జారీ చేసింది. ఈ జిల్లాల్లో కొన్ని చోట్ల అత్యంత భారీ వర్షపాతం నమోదయ్యే అవకాశం ఉందని అంచనా వేసింది. అలాగే ములుగు, నల్గొండ, జనగామ, యాదాద్రి భువనగిరి, వరంగల్, హనుమకొండ జిల్లాలకు ఎల్లో అలర్ట్ ప్రకటించింది. ఆయా జిల్లాల్లో ఉరుములు, మెరుపులతో పాటు మోస్తరు నుంచి భారీ వర్షాలు కురిసే అవకాశం ఉందని అధికారులు తెలిపారు.
నవంబర్ 20, 21 తేదీల్లో పలు ప్రాంతాల్లో గంటకు 40 నుంచి 50 కిలోమీటర్ల వేగంతో, కొన్నిచోట్ల అంతకంటే ఎక్కువ వేగంతో ఈదురుగాలులు వీచే అవకాశం ఉందని వాతావరణ నిపుణులు సూచిస్తున్నారు. తూర్పు, మధ్య తెలంగాణ జిల్లాలపై తుఫాన్ ప్రభావం అధికంగా ఉండవచ్చని, లోతట్టు ప్రాంతాల ప్రజలు, రైతులు, అధికారులు అప్రమత్తంగా ఉండాలని సూచించారు.
మరోవైపు, ఆంధ్రప్రదేశ్ తీరం వైపు తుఫాన్ కదులుతున్న నేపథ్యంలో కోస్తాంధ్ర జిల్లాల్లోనూ వర్షాల ప్రభావం కనిపించనుంది. రేపటి నుంచి కోస్తాంధ్రలోని పలు ప్రాంతాల్లో భారీ వర్షాలు కురిసే అవకాశం ఉందని రాష్ట్ర విపత్తుల నిర్వహణ సంస్థ (SDMA) అంచనా వేసింది. మత్స్యకారులు సముద్రంలోకి వేటకు వెళ్లొద్దని అధికారులు ఇప్పటికే హెచ్చరికలు జారీ చేశారు. తుఫాన్ కదలికలను నిరంతరం పర్యవేక్షిస్తూ, పరిస్థితులకు అనుగుణంగా ముందస్తు జాగ్రత్తలు తీసుకోవాలని అధికార యంత్రాంగం ప్రజలకు విజ్ఞప్తి చేసింది.
