క్రైమ్ మిర్రర్ : రష్యాలో ఘోర విమాన ప్రమాదం చోటుచేసుకుంది. శిక్షణలో భాగంగా బయలుదేరిన టీయూ-95ఎంఎస్ బాంబర్ విమానం కొద్దిసేపటికే కుప్పకూలడంతో ఆరుగురు ప్రాణాలు కోల్పోయారు. మరో వ్యక్తి గాయపడినట్లు రష్యా రక్షణ శాఖ వెల్లడించింది. రష్యాలోని అముర్ ప్రాంతంలో మంగళవారం ఈ ప్రమాదం జరిగినట్లు అధికారులు తెలిపారు. క్రాస్నోయారోవో పరిసరాల్లో శిక్షణ కార్యక్రమం కోసం విమానం బయలుదేరిన కొద్దిసేపటికే ప్రమాదానికి గురైనట్లు సమాచారం. ప్రమాదం జరిగిన సమయంలో విమానంలో మొత్తం ఏడుగురు సిబ్బంది ఉన్నట్లు రష్యా రక్షణ శాఖ పేర్కొంది.
విమానం జనసంచారం లేని ప్రాంతంలో కూలిపోవడంతో భారీ ప్రాణనష్టం జరిగినట్లు తెలుస్తోంది. ప్రమాదం గురించి సమాచారం అందిన వెంటనే సహాయక బృందాలు ఘటనాస్థలానికి చేరుకుని సహాయక చర్యలు చేపట్టాయి. తీవ్రంగా గాయపడిన వ్యక్తిని రక్షించి అత్యవసర చికిత్స కోసం ఆసుపత్రికి తరలించారు. ప్రమాదంలో మృతి చెందిన ఆరుగురి మృతదేహాలను సహాయక సిబ్బంది స్వాధీనం చేసుకున్నట్లు అధికారులు తెలిపారు. ఘటనకు సంబంధించిన దృశ్యాలు సోషల్ మీడియాలో వైరల్గా మారాయి. అయితే వైరల్ అవుతున్న వీడియోల పూర్తి ప్రామాణికతపై స్వతంత్ర నిర్ధారణ జరగాల్సి ఉంది.
విమానం ప్రమాదానికి గురికావడానికి అసలు కారణం ఏమిటన్నది ఇంకా స్పష్టంగా తెలియలేదు. సాంకేతిక సమస్య, ఇతర కారణాలపై అధికారులు దర్యాప్తు చేపట్టారు. ప్రమాదానికి దారితీసిన పరిస్థితులను గుర్తించేందుకు సంబంధిత విభాగాలు వివరాలను సేకరిస్తున్నట్లు రష్యా అధికారులు తెలిపారు.
also read : థియేటర్లో 22 నిమిషాలు ప్రకటనలు.. యాజమాన్యానికి రూ.75 వేల జరిమానా