Odisha: ఒడిశా రాష్ట్రంలో ఉన్న మహానది తీరంలో అనూహ్య ఘటన వెలుగులోకి రావడం స్థానికంగా తీవ్ర చర్చకు దారితీసింది. గత శనివారం సాయంత్రం సమయంలో సన్ముండాలి గ్రామానికి చెందిన కొంతమంది చిన్నారులు ప్రతిరోజులాగే చేపల వేట కోసం నదికి వెళ్లగా, వారి వలలో సాధారణంగా చిక్కే చేపల స్థానంలో ఒక దేవి విగ్రహం చిక్కడం అందరినీ ఆశ్చర్యానికి గురిచేసింది. ఆ విగ్రహాన్ని దగ్గరగా పరిశీలించగా అది దుర్గా మాతకు చెందినదని గుర్తించారు. చిన్నారులు ఈ విషయాన్ని వెంటనే గ్రామస్థుడు మనాస్ బెహెరాకు తెలియజేయడంతో, ఆయన సహా మరికొంత మంది గ్రామస్థులు కలిసి నదిలో మరింతగా శోధన చేపట్టారు. ఆ సమయంలో అక్కడి పరిస్థితి మరింత ఆశ్చర్యాన్ని కలిగించింది. ఒక్కటి రెండు కాకుండా 90కు పైగా లోహంతో తయారు చేసిన నాగ విగ్రహాలు, శివుడు, గణేశుడు, సరస్వతి విగ్రహాలు వరుసగా బయటపడటంతో ఈ ఘటనపై అనుమానాలు పెరిగాయి. అంతేకాకుండా 3 శంఖాలను కూడా ఒకేసారి బండిల్స్లా కట్టేసి నదిలో ముంచివేసినట్టు గుర్తించడం పరిస్థితిని మరింత గందరగోళంగా మార్చింది.
ఈ సంఘటన వెలుగులోకి రావడంతో గ్రామంలో ఒక్కసారిగా ఉత్కంఠ వాతావరణం నెలకొంది. ఇంత పెద్ద ఎత్తున విగ్రహాలను ఎవరు, ఎందుకు నదిలో పడేశారు అన్న ప్రశ్నలు గ్రామస్థుల్లో చర్చకు దారితీశాయి. ఇది ఏదైనా ప్రత్యేక పూజలలో భాగంగా చేసిన చర్యనా, లేక దూర ప్రాంతాల నుంచి కొట్టుకువచ్చాయా, లేదా మరేదైనా రహస్య కారణం ఉందా అన్న అనుమానాలు వ్యక్తమవుతున్నాయి. గ్రామస్థులు బయటపడ్డ విగ్రహాలను సురక్షితంగా తీసుకెళ్లి స్థానిక జగన్నాథ ఆలయంలో ఉంచగా, సమాచారం అందుకున్న పోలీసులు వెంటనే సంఘటనా స్థలానికి చేరుకుని అన్ని విగ్రహాలు, శంఖాలను స్వాధీనం చేసుకున్నారు. ప్రస్తుతం ఈ ఘటనపై పూర్తి స్థాయిలో దర్యాప్తు కొనసాగుతోంది. మహానదిలో ఇలాంటి ఘటన వెలుగులోకి రావడం స్థానికంగా మాత్రమే కాకుండా ఇతర ప్రాంతాల ప్రజల్లో కూడా ఆసక్తిని రేకెత్తిస్తోంది. ఈ సంఘటన వెనుక అసలు కారణం ఏమిటన్నది తెలుసుకోవాలంటే పోలీసుల దర్యాప్తు పూర్తయ్యే వరకు వేచి చూడాల్సిందే.
ALSO READ: Paddy Procurement: తాలు పేరుతో కోతలు.. ధాన్యం అమ్ముకోలేక రైతుల అవస్థలు!
