రీల్ తీద్దామని పిలిచి తోటి విద్యార్థిపై అఘాయిత్యం!

బీహార్ రాష్ట్రంలో దారుణమైన ఘటన ఒకటి వెలుగులోకి వచ్చింది. ఖగారియా జిల్లాలోని బెల్దౌర్ పోలీస్ స్టేషన్ పరిధిలో సక్రోహర్ పంచాయతీలో జరిగిన ఈ సంఘటనలో ఒక మైనర్ బాలుడు పాశవికంగా హత్యకు గురవడం తీవ్ర కలకలం రేపుతోంది. స్నేహితుల మధ్య ఉన్న విభేదాలు ఎంత భయంకర స్థాయికి దారి తీస్తాయో ఈ ఘటన స్పష్టంగా చూపించింది. బాధిత బాలుడిని అతని ఇద్దరు మైనర్ స్నేహితులే సోషల్ మీడియా రీల్ తీస్తామనే నెపంతో ఇంటి బయటకు పిలిచి, అనంతరం అతని చేతులు, కాళ్లు కట్టేసి కత్తితో పలుమార్లు దాడి చేసి హత్య చేసినట్టు పోలీసులు వెల్లడించారు.

ఈ కేసును నమోదు చేసి దర్యాప్తు ప్రారంభించిన పోలీసులకు అనేక సంచలన విషయాలు వెలుగులోకి వచ్చాయి. పాత కక్షలే ఈ ఘోరానికి ప్రధాన కారణమని విచారణలో తేలింది. ముందుగా ప్రణాళిక ప్రకారం బాధితుడిని బయటకు పిలిచిన ఇద్దరు మైనర్ నిందితులు అతన్ని అదుపులోకి తీసుకుని చేతులు, కాళ్లు కట్టేసి అమానుషంగా హింసించారు. అనంతరం కత్తితో పలుమార్లు పొడిచి హత్య చేసి, మృతదేహాన్ని గుర్తించకుండా దాచిపెట్టే ప్రయత్నం చేశారు. ఈ దారుణ ఘటన స్థానిక ప్రజలను తీవ్రంగా కలచివేసింది. పోలీసులు 8వ, 9వ తరగతుల్లో చదువుతున్న ఇద్దరు అనుమానితులను అదుపులోకి తీసుకుని విచారణ కొనసాగిస్తున్నారు.

మార్చి 19 సాయంత్రం హిమాంశు అనే బాలుడు పాఠశాల నుండి ఇంటికి చేరుకుని బయట ఆడుకుంటుండగా అకస్మాత్తుగా కనిపించకుండా పోయాడు. రాత్రి వరకు ఇంటికి రాకపోవడంతో ఆందోళన చెందిన అతని తల్లి బెల్దౌర్ పోలీస్ స్టేషన్‌లో ఫిర్యాదు చేసింది. వెంటనే గాలింపు చర్యలు ప్రారంభించిన పోలీసులు.. గ్రామ సమీపంలోని అడవిలో అతని మృతదేహాన్ని గుర్తించారు. శరీరంపై అనేక గాయాలు ఉండటం ఈ హత్య ఎంత క్రూరంగా జరిగిందో స్పష్టం చేసింది. స్థానికుల సమాచారం ప్రకారం.. కొన్ని రోజుల క్రితం హిమాంశు ఇచ్చిన సమాచారం ఆధారంగా అతని ఇద్దరు స్నేహితులు దొంగతనం కేసులో పట్టుబడి, పంచాయతీ ద్వారా శిక్షకు గురయ్యారు. ఆ సంఘటనతో ఆగ్రహానికి లోనైన వారు ప్రతీకారం తీర్చుకోవాలనే ఉద్దేశంతో ఈ హత్యకు పాల్పడ్డారని పోలీసులు వెల్లడించారు.

హత్యకు ముందు ముగ్గురు కలిసి తరచుగా వీడియోలు తీసి సోషల్ మీడియాలో పోస్ట్ చేసేవారని, అదే కారణంగా రీల్ తీస్తామని చెప్పి బాధితుడిని బయటకు పిలిచినట్లు విచారణలో బయటపడింది. నిందితులు తమ నేరాన్ని అంగీకరించడంతో పాటు, హత్యకు ఉపయోగించిన కత్తి, ఒక బ్రాస్‌లెట్, ఒక మొబైల్ ఫోన్ సహా అనేక వస్తువులను పోలీసులు స్వాధీనం చేసుకున్నారు. మృతుడి మెడపై, శరీరంపై ఉన్న గాయాలు ఈ ఘటన తీవ్రతను మరింత స్పష్టం చేస్తున్నాయి. ఈ కేసును ప్రతి కోణంలోనూ పరిశీలిస్తూ దర్యాప్తు కొనసాగిస్తున్నామని, చట్టప్రకారం కఠిన చర్యలు తీసుకుంటామని స్టేషన్ ఇన్‌చార్జ్ తెలిపారు. ఈ సంఘటన యువతలో పెరుగుతున్న హింసాత్మక ధోరణులపై మరోసారి ఆందోళన వ్యక్తం చేస్తోంది.

ALSO READ: పానీపూరీతో ఇంత సంపాదనా?.. తెలిస్తే నోరెళ్లబెడతారు!