అనకాపల్లి జిల్లాలోని ఓ గ్రామంలో ఊహించని ఘటన ఒక్కసారిగా భయాందోళనలను రేకెత్తించింది. గ్రామ సర్పంచ్ ఇంట్లో కుటుంబ సభ్యులు తమ తమ పనుల్లో నిమగ్నమై ఉండగా, ఇంటి పరిసరాల్లో విచిత్రమైన శబ్దాలు వినిపించాయి. ఎప్పుడూ వినని ఆ శబ్దాలు అనుమానం కలిగించడంతో బయటకు వెళ్లి చూసిన కుటుంబ సభ్యులు క్షణాల్లో గుండె ఆగిపోయేంత షాక్కు గురయ్యారు. వన్యప్రాణులు ఉండాల్సిన అడవులను వదిలి జనావాసాల్లోకి రావడం ఇటీవలి కాలంలో పెరిగిపోతున్న నేపథ్యంలో, ఇలాంటి సంఘటనలు ప్రజల్లో భయాన్ని మరింత పెంచుతున్నాయి.
వి.మాడుగుల మండలం ద్వారకానగర్ గ్రామానికి చెందిన సర్పంచ్ నాయుడు ఇంటి వద్ద భారీ గిరినాగు సంచరించడం కలకలం రేపింది. ఏకంగా 12 అడుగుల పొడవున్న ఈ కింగ్ కోబ్రా ఇంట్లోకి చొరబడి చుట్టూ తిరుగుతూ బుసలు కొట్టడంతో కుటుంబ సభ్యులు భయంతో బయటకు పరుగులు తీశారు. ఒక్కసారిగా ఇలాంటి ప్రమాదకర పరిస్థితి ఎదురవడంతో ఇంట్లో ఉన్నవారంతా తీవ్ర భయాందోళనలకు గురయ్యారు.
ఈ ఘటనపై సమాచారం అందుకున్న పాముల పట్టే నిపుణుడు వెంకటేష్ వెంటనే అక్కడికి చేరుకుని పరిస్థితిని సమీక్షించాడు. దాదాపు 2 గంటల పాటు శ్రమించి, ఎంతో జాగ్రత్తగా ఆ భారీ పామును అదుపులోకి తీసుకున్నాడు. పామును పట్టుకునే సమయంలో అది తీవ్రంగా ప్రతిఘటిస్తూ అతడికి కూడా సవాల్ విసిరింది. అయినప్పటికీ తన అనుభవంతో వెంకటేష్ చివరికి ఆ కింగ్ కోబ్రాను సురక్షితంగా పట్టుకున్నాడు.
తరువాత అటవీ శాఖ అధికారుల సమక్షంలో ఆ పామును సమీపంలోని రిజర్వ్ అడవిలో వదిలిపెట్టారు. దీంతో గ్రామస్తులు, కుటుంబ సభ్యులు ఊపిరి పీల్చుకున్నారు. ఇటీవలి కాలంలో ఆహారం కోసం లేదా నివాస ప్రాంతాల మార్పు కారణంగా అడవి జంతువులు జనావాసాల్లోకి రావడం పెరుగుతుండటం ఆందోళన కలిగించే విషయం. ఈ ఘటన కూడా అదే పరిస్థితిని మరోసారి స్పష్టంగా చూపించింది.
ALSO READ: ఒళ్లు గుగుర్పాటుకు గురి చేస్తున్న వీడియో!
