బాలీవుడ్ ప్రముఖ నటుడు అజయ్ దేవ్‌గణ్ పాన్ మసాలా ప్రకటన వివాదంలో న్యాయస్థానాన్ని ఆశ్రయించారు. విమల్ ఇలాచీ పాన్ మసాలా వాణిజ్య ప్రకటనలో నటించినందుకు మహారాష్ట్ర ఫుడ్ అండ్ డ్రగ్ అడ్మినిస్ట్రేషన్ (FDA) జారీ చేసిన షోకాజ్ నోటీసును ఆయన ముంబై హైకోర్టులో సవాల్ చేశారు. ఈ వ్యవహారం బాలీవుడ్‌లో చర్చనీయాంశంగా మారింది.
విమల్ ఇలాచీ బ్రాండ్‌కు సంబంధించిన ప్రకటనల్లో అజయ్ దేవ్‌గణ్ కనిపించిన నేపథ్యంలో మహారాష్ట్ర ఎఫ్‌డీఏ ఆయనకు నోటీసులు జారీ చేసింది. ప్రకటనల ద్వారా ప్రజలకు ఎలాంటి సందేశం వెళ్తుందనే అంశంతో పాటు, వాటి ప్రచారానికి సంబంధించిన వివరాలను అధికారులు కోరినట్లు సమాచారం.
ఈ వివాదంలో అజయ్ దేవ్‌గణ్‌తో పాటు బాలీవుడ్ నటులు షారుక్ ఖాన్, టైగర్ ష్రాఫ్ పేర్లు కూడా తెరపైకి వచ్చాయి. వీరికి సైతం ఎఫ్‌డీఏ నోటీసులు జారీ చేసినట్లు తెలుస్తోంది. పాన్ మసాలా ప్రకటనలను అన్ని మీడియా వేదికల నుంచి తొలగించాలని, ఆయా బ్రాండ్లతో కుదుర్చుకున్న ప్రమోషన్ ఒప్పందాలకు సంబంధించిన వివరాలను సమర్పించాలని అధికారులు ఆదేశించారు.
అయితే, తనకు జారీ చేసిన షోకాజ్ నోటీసును అజయ్ దేవ్‌గణ్ హైకోర్టులో సవాల్ చేయడంతో ఈ వ్యవహారం మరో మలుపు తిరిగింది. ఈ పిటిషన్‌పై న్యాయస్థానం ఎలా స్పందిస్తుందన్నది ఆసక్తికరంగా మారింది. సినిమా తారలు వాణిజ్య ప్రకటనల్లో నటించే అంశంపై మరోసారి చర్చ మొదలైంది.
also read: ప్రముఖ బాలీవుడ్ దర్శకుడు సంజయ్ గుప్తా కన్నుమూత.. బాత్రూమ్‌లో ప్రమాదవశాత్తు జారిపడి మృతి!