ప్రకృతిలో కనిపించే అద్భుత జీవుల్లో ఏనుగుకు ప్రత్యేకమైన స్థానం ఉంది. భారీ కాయంతో పాటు అసాధారణమైన తెలివితేటలు, భావోద్వేగాలు కలిగిన ఈ జంతువు గురించి అనేక ఆసక్తికర విషయాలు ఉన్నాయి. ఏనుగులు తమకు జరిగిన సంఘటనలను చాలా కాలం పాటు గుర్తుంచుకునే శక్తి కలిగి ఉంటాయి. ఒకసారి ఎవరో హాని చేస్తే దాన్ని అవి సులభంగా మర్చిపోవు. సంవత్సరాల తర్వాత కూడా ఆ వ్యక్తిని గుర్తించగలగడం వాటి జ్ఞాపకశక్తి ఎంత బలంగా ఉంటుందో చూపిస్తుంది. ఇవి సాధారణంగా 7,000 కిలోల వరకు బరువు పెరుగుతాయి. అయితే ఈ భారీ కాయానికి తగ్గట్టుగానే వాటి తొండం అద్భుతమైన నిర్మాణంతో ఉంటుంది. ఏనుగు తొండంలో దాదాపు 40,000 కండరాలు ఉండటం వల్ల చిన్న గింజల నుంచి భారీ వస్తువుల వరకు ఎత్తగలగడం వీటికి సాధ్యమవుతుంది.
ఏనుగులు కేవలం బలమైన జంతువులు మాత్రమే కాదు, భావోద్వేగాలను వ్యక్తం చేయగల సున్నితమైన జీవులు కూడా. తమ సమూహంలోని మరో ఏనుగు మరణిస్తే అవి దాని వద్ద చాలా సమయం గడుపుతూ దుఃఖాన్ని వ్యక్తం చేస్తాయి. ఈ లక్షణం వాటి సామూహిక జీవన విధానాన్ని స్పష్టంగా తెలియజేస్తుంది. అలాగే ఏనుగులు చాలా తక్కువగా, రోజుకు కేవలం 2 నుంచి 3 గంటల వరకు మాత్రమే నిద్రపోతాయి. కానీ రోజంతా విపరీతంగా ఆహారం, నీటిని తీసుకుంటాయి. ఒక ఏనుగు రోజుకు దాదాపు 300 కిలోల ఆహారం తీసుకుంటే, 160 లీటర్ల వరకు నీటిని తాగుతుంది. అంతేకాకుండా తన తొండంలో సుమారు 8 లీటర్ల నీటిని నిల్వ ఉంచుకుని అవసరమైనప్పుడు ఉపయోగించుకుంటుంది.
ఏనుగుల ప్రత్యేకతల్లో మరో ముఖ్యమైన విషయం వాటి దూర గ్రహణశక్తి. ఇవి సుమారు 20 కిలోమీటర్ల దూరంలో ఉన్న నీటి వనరులను కూడా గుర్తించగలవు. ఇది వాటి జీవనానికి కీలకంగా సహాయపడుతుంది. ఇంతటి బలం, తెలివితేటలు ఉన్నప్పటికీ చిన్న కీటకాలను చూసి భయపడటం వెనుక కూడా ఒక కారణం ఉంది. చెవులు చాలా సున్నితంగా ఉండటం వల్ల వాటిని రక్షించుకునేందుకు ఈ విధంగా స్పందిస్తాయని నిపుణులు చెబుతున్నారు. మొత్తంగా చూస్తే, ఏనుగులు ప్రకృతిలో అత్యంత ప్రత్యేకమైన, ఆశ్చర్యకరమైన లక్షణాలతో కూడిన జీవులుగా నిలుస్తాయి.
ALSO READ: గ్యాస్ సిలిండర్ వాడేవారికి లాస్ట్ ఛాన్స్.. ఇది చేయకపోతే..
