దక్షిణ అంతర్గత కర్ణాటక, పరిసర ప్రాంతాలపై ఏర్పడిన ఉపరితల ఆవర్తనం ప్రస్తుతం సగటు సముద్ర మట్టానికి 1.5 కి.మీ ఎత్తులో విస్తరించి కొనసాగుతోంది. అదేవిధంగా మన్నార్ గల్ఫ్ నుంచి దక్షిణ మధ్య మహారాష్ట్ర వరకు తమిళనాడు, అంతర్గత కర్ణాటక మీదుగా సగటు సముద్ర మట్టానికి 0.9 కి.మీ ఎత్తులో ద్రోణి ఏర్పడి కొనసాగుతోంది. ఈ వాతావరణ వ్యవస్థల ప్రభావంతో ఆంధ్రప్రదేశ్, యానాం ప్రాంతాల్లో దిగువ ట్రోపో ఆవరణంలో ఆగ్నేయ, నైరుతి దిశల నుంచి గాలులు వీస్తున్నాయి. ఈ పరిణామాల కారణంగా రాబోయే 3 రోజుల పాటు రాష్ట్రవ్యాప్తంగా వాతావరణంలో మార్పులు చోటుచేసుకునే అవకాశం ఉందని వాతావరణ శాఖ సూచిస్తోంది. పలు ప్రాంతాల్లో తేలికపాటి నుంచి మోస్తరు వర్షాలు, ఉరుములు, మెరుపులతో కూడిన జల్లులు పడే సూచనలు కనిపిస్తున్నాయి.
ఉత్తర కోస్తా ఆంధ్రప్రదేశ్, యానాం ప్రాంతాల్లో ఆదివారం, సోమవారం, మంగళవారం రోజులలో ఒకటి లేదా రెండు చోట్ల తేలికపాటి నుంచి మోస్తరు వర్షాలు కురిసే అవకాశం ఉంది. ఈ సమయంలో ఉరుములు, మెరుపులు సంభవించే అవకాశముండగా, గంటకు 30 నుంచి 40 కిలోమీటర్ల వేగంతో ఈదురు గాలులు వీస్తాయని, కొన్ని ప్రాంతాల్లో గరిష్టంగా 50 కిలోమీటర్ల వేగం నమోదయ్యే అవకాశముందని వాతావరణ శాఖ తెలిపింది. అదే విధంగా దక్షిణ కోస్తా ఆంధ్రప్రదేశ్ ప్రాంతాల్లో కూడా ఇదే తరహా వాతావరణ పరిస్థితులు కొనసాగే అవకాశం ఉందని పేర్కొంది. అక్కడ కూడా 3 రోజుల పాటు విడతల వారీగా వర్షాలు కురిసే అవకాశం ఉండగా, ఉరుములు, మెరుపులతో పాటు గాలుల వేగం 30 నుంచి 40 కిలోమీటర్ల వరకు ఉండి, గరిష్టంగా 50 కిలోమీటర్లకు చేరుకునే అవకాశముంది.
రాయలసీమ ప్రాంతంలో ఆదివారం, సోమవారం రోజులలో ప్రధానంగా పొడి వాతావరణం నెలకొనే సూచనలు ఉన్నప్పటికీ, మంగళవారం మాత్రం వాతావరణంలో మార్పు చోటుచేసుకుని తేలికపాటి నుంచి మోస్తరు వర్షాలు కురిసే అవకాశం ఉందని తెలిపారు. అక్కడ కూడా ఉరుములు, మెరుపులు సంభవించే అవకాశం ఉండగా, ఈదురు గాలులు గంటకు 30 నుంచి 40 కిలోమీటర్ల వేగంతో వీస్తాయని, కొన్ని ప్రాంతాల్లో గరిష్టంగా 50 కిలోమీటర్ల వేగం నమోదయ్యే అవకాశం ఉందని అంచనా వేశారు. ఈ వర్షాల సమయంలో పిడుగులు పడే ప్రమాదం ఉన్నందున ప్రజలు అప్రమత్తంగా ఉండాలని అధికారులు సూచిస్తున్నారు. ముఖ్యంగా వర్షం పడుతున్న సమయంలో చెట్ల కింద నిలబడకుండా, విద్యుత్ స్తంభాలకు దూరంగా ఉండాలని హెచ్చరిస్తున్నారు. అలాగే ఆ సమయంలో ఎలక్ట్రానిక్ పరికరాల వినియోగాన్ని తగ్గించడం మంచిదని సూచనలు జారీ చేశారు.
ALSO READ: రీల్ తీద్దామని పిలిచి తోటి విద్యార్థిపై అఘాయిత్యం!