– బెజవాడ రాజకీయాల్లో కొత్త ట్విస్ట్
– పవన్ కల్యాణ్ సమక్షంలో జనసేనలో చేరిన రాధాకృష్ణ
– జనసేనలో చేరిన వంగవీటి రాధా.. విజయవాడ మేయర్ పీఠంపై కన్నేశారా?
– మేయర్ అభ్యర్థిగా రాధా పేరు తెరపైకి
– 86 డివిజన్లలో సీట్ల పంపకాలపై కూటమి కసరత్తు
– జనసేనకు 35 సీట్లు కావాలి.. టీడీపీ ప్రతిపాదనపై ఆసక్తి
క్రైమ్ మిర్ర, ఆంధ్రప్రదేశ్:- విజయవాడ రాజకీయాల్లో ఇప్పుడు ఒకటే చర్చ.. వంగవీటి రాధాకృష్ణ తదుపరి అడుగు ఏమిటి? జనసేనలో చేరడంతో ఆయన రాజకీయ ప్రయాణం కొత్త మలుపు తిరిగింది. ఇదే సమయంలో స్థానిక సంస్థల ఎన్నికల సందడి మొదలవడంతో విజయవాడ మేయర్ పీఠానికి ఆయన పోటీ చేస్తారనే ఊహాగానాలు తెరపైకి వచ్చాయి. అయితే, ఈ ప్రచారానికి పార్టీ నుంచి అధికారిక స్పష్టత రావాల్సి ఉంది.
పవన్ సమక్షంలో జనసేనలోకి..
మాజీ ఎమ్మెల్యే వంగవీటి రాధాకృష్ణ బుధవారం అమరావతిలోని జనసేన కేంద్ర కార్యాలయంలో పవన్ కల్యాణ్ సమక్షంలో ఆ పార్టీలో చేరారు. డిప్యూటీ సీఎం ఆయనకు జనసేన కండువా కప్పి పార్టీలోకి ఆహ్వానించారు. తిరుపతికి చెందిన ప్రణీత్ ప్రమోద్ కూడా ఇదే కార్యక్రమంలో జనసేనలో చేరారు.
వైసీపీ నుంచి బయటకు వచ్చిన తర్వాత టీడీపీతో కలిసి పనిచేస్తూ వచ్చిన రాధాకృష్ణ.. గత సార్వత్రిక ఎన్నికల్లో కూటమి అభ్యర్థుల గెలుపు కోసం కృషి చేశారు. ఇప్పుడు జనసేనలో చేరడంతో ఆయనకు పార్టీ ఎలాంటి బాధ్యతలు అప్పగిస్తుందన్న అంశం ఆసక్తికరంగా మారింది.
మేయర్ బరిలో రాధా ఉంటారా?
స్థానిక సంస్థల ఎన్నికల నేపథ్యంలో విజయవాడ మేయర్ పదవికి రాధాకృష్ణ పేరును పరిశీలించే అవకాశం ఉందనే చర్చ రాజకీయ వర్గాల్లో సాగుతోంది. అయితే, విజయవాడ మేయర్ సీటును కూటమిలో జనసేనకు కేటాయిస్తారా? ఒకవేళ ఆ పార్టీకి దక్కితే రాధాకృష్ణ పోటీ చేస్తారా? అనే ప్రశ్నలకు ఇంకా సమాధానం లేదు.
ఇప్పటికే మేయర్లు, మున్సిపల్ ఛైర్‌పర్సన్లు, జడ్పీ ఛైర్మన్ల పదవులకు రిజర్వేషన్లు ఖరారు చేస్తూ ప్రభుత్వం గెజిట్‌లు విడుదల చేసింది. రాష్ట్ర ఎన్నికల కమిషనర్ అనిల్ చంద్ర పునేఠా స్థానిక సంస్థల ఎన్నికల షెడ్యూల్‌ను ప్రకటించడంతో రాజకీయ పార్టీల్లో కదలికలు పెరిగాయి.
సీట్ల లెక్కల్లో కూటమి నేతలు
మరోవైపు స్థానిక ఎన్నికల్లో సీట్ల సర్దుబాటుపై టీడీపీ, జనసేన నేతలు చర్చలు జరుపుతున్నారు. ముఖ్యమంత్రి చంద్రబాబుతో జనసేన నేతలు నాదెండ్ల మనోహర్, లింగమనేని రమేశ్, హరిప్రసాద్ సమావేశమయ్యారు.విజయవాడలోని మొత్తం 86 డివిజన్లలో 35 స్థానాలను తమకు కేటాయించాలని జనసేన కోరుతున్నట్లు సమాచారం. అయితే, టీడీపీ 15 స్థానాలు ఇచ్చేందుకు సిద్ధంగా ఉన్నట్లు ప్రచారం జరుగుతోంది. ఈ సంఖ్యలపై అధికారిక ప్రకటన వెలువడలేదు.మేయర్ అభ్యర్థి ఎంపికతోపాటు డివిజన్ల వారీగా సీట్ల పంపకాలు కూడా కీలకంగా మారాయి. జనసేనలో రాధాకృష్ణ చేరిక విజయవాడ రాజకీయాల్లో ఎలాంటి ప్రభావం చూపుతుందో, కూటమి నేతలు సీట్ల సర్దుబాటును ఎలా పూర్తి చేస్తారో చూడాలి.