‘నందూస్ వరల్డ్’ యూట్యూబ్ ఛానెల్ ద్వారా గుర్తింపు పొందిన రమా నందన చేసిన ఓ సోషల్ మీడియా పోస్ట్ ప్రస్తుతం చర్చనీయాంశంగా మారింది. సెప్టెంబర్ 7న తన జీవితంలో తీవ్ర క్లిష్ట పరిస్థితిని ఎదుర్కొన్నానంటూ ఆమె చేసిన వ్యాఖ్యలు సోషల్ మీడియాలో వైరల్‌గా మారాయి. అయితే, తన పోస్టులో కేసుకు సంబంధించిన పూర్తి వివరాలను ఆమె వెల్లడించలేదు.
విదేశాల్లో ఉద్యోగాలు, వీసాలు ఇప్పిస్తామని చెప్పి పలువురి నుంచి డబ్బులు వసూలు చేశారంటూ రమా నందనపై ఆరోపణలు ఉన్నాయి. ఈ వ్యవహారంలో ఓ బాధితుడు యూకేలో ఉద్యోగం ఇప్పిస్తానని చెప్పి తన నుంచి సుమారు రూ.15 లక్షలు తీసుకున్నారని ఫిర్యాదు చేసినట్లు సమాచారం. ఈ కేసుకు సంబంధించి ఆంధ్రప్రదేశ్‌లోని ఇబ్రహీంపట్నం పోలీసులు ఆమెపై లుక్ అవుట్ సర్క్యులర్ జారీ చేశారు.
ఈ నేపథ్యంలో సెప్టెంబర్ 7న హైదరాబాద్ శంషాబాద్ విమానాశ్రయంలో ఇమ్మిగ్రేషన్ అధికారులు రమా నందనను గుర్తించినట్లు తెలుస్తోంది. అనంతరం ఆమెను ఇబ్రహీంపట్నం పోలీసులకు అప్పగించారు. పోలీసులు సుమారు నాలుగు గంటల పాటు ఆమెను విచారించినట్లు సమాచారం. ప్రధానంగా ‘డెస్టినీ కన్సల్టెన్సీ’కి సంబంధించిన వ్యవహారాలపై ఆమెను ప్రశ్నించినట్లు తెలుస్తోంది.
అయితే, డెస్టినీ కన్సల్టెన్సీతో తనకు ఎలాంటి సంబంధం లేదని రమా నందన గతంలోనే స్పష్టం చేసినట్లు సమాచారం. ఆ సంస్థకు సంబంధించిన వ్యవహారాలను తన భర్త మధుకర్ చూసుకుంటారని ఆమె పేర్కొన్నట్లు తెలుస్తోంది. తనపై, తన కుటుంబంపై ఉద్దేశపూర్వకంగా తప్పుడు ప్రచారం చేస్తున్నారని కూడా ఆమె ఆరోపించారు.
ఇదిలా ఉండగా.. తాజాగా రమా నందన చేసిన సోషల్ మీడియా పోస్టులో కేసు, పోలీసుల విచారణ వంటి అంశాలను నేరుగా ప్రస్తావించలేదు. “సెప్టెంబర్ 7న నేను నేలపై కాలుమోపినప్పుడు.. నా జీవితంలో ఓ కఠినమైన పరిస్థితిని ఎదుర్కొన్నాను” అంటూ ఆమె పేర్కొన్నారు. ఈ వ్యాఖ్యల నేపథ్యంలో అసలు సెప్టెంబర్ 7న ఏం జరిగిందనే అంశంపై సోషల్ మీడియాలో చర్చ జరుగుతోంది.
అయితే, ఈ కేసులో ఉన్న ఆరోపణలు దర్యాప్తులో ఉన్న అంశాలే కావడంతో వాటిపై తుది నిర్ధారణ రావాల్సి ఉంది.
also read: చేతబడి చేస్తుందన్న అనుమానంతో వృద్ధురాలిపై దాడి.. చెట్టుకు కట్టేసి కొట్టిన గ్రామస్థులు