వివాహేతర సంబంధం పెట్టుకున్నాడనే ఆరోపణల నేపథ్యంలో అస్సాంలో ఓ వ్యక్తిని స్థానికులు పట్టుకుని పోలీసులకు అప్పగించిన ఘటన కలకలం రేపుతోంది. ఆదివారం రంగియా ప్రాంతంలో ఈ ఘటన చోటుచేసుకున్నట్లు సమాచారం.
స్థానికుల వివరాల ప్రకారం.. రంగియాకు చెందిన అజీజ్ అలీ అనే వ్యక్తి ఓ మహిళతో ఆమె భర్త ఇంట్లో లేని సమయంలో అనుమానాస్పద పరిస్థితుల్లో కనిపించినట్లు తెలుస్తోంది. దీంతో ఆగ్రహించిన కొందరు గ్రామస్థులు అతడిని పట్టుకుని చెప్పులతో చేసిన దండను మెడలో వేసి గ్రామంలో ఊరేగించినట్లు సమాచారం.
అనంతరం అజీజ్ అలీని హాజో పోలీసులకు అప్పగించారు. ఘటనపై పోలీసులు కేసు నమోదు చేసి, వివిధ కోణాల్లో దర్యాప్తు చేస్తున్నట్లు తెలుస్తోంది. ఈ ఘటనకు సంబంధించిన దృశ్యాలు సోషల్ మీడియాలో వైరల్గా మారాయి.
అయితే వైరల్ అవుతున్న వీడియోలో కనిపించే వ్యక్తి, ఘటనకు సంబంధించిన పూర్తి వివరాలను పోలీసులు అధికారికంగా నిర్ధారించాల్సి ఉంది. చట్టాన్ని చేతుల్లోకి తీసుకుని వ్యక్తులను అవమానించడం లేదా శిక్షించడం సరికాదని న్యాయ నిపుణులు సూచిస్తున్నారు.
also read:డీజే సౌండ్కు డ్యాన్స్ చేస్తూ గుండెపోటుతో కుప్పకూలిన యువకుడు.. పెళ్లి వేడుకలో విషాదం