ఆంధ్రప్రదేశ్లో నిరుద్యోగ యువత ఎంతోకాలంగా ఎదురుచూస్తున్న మరో మెగా ఉపాధ్యాయ నియామక ప్రక్రియకు రాష్ట్ర ప్రభుత్వం శ్రీకారం చుట్టింది. ఉద్యోగ క్యాలెండర్ అమలులో భాగంగా మెగా డీఎస్సీ-2026 నిర్వహించనున్నట్లు ప్రభుత్వం అధికారికంగా ప్రకటించింది. ఈ మేరకు విద్యాశాఖ కార్యదర్శి కోన శశిధర్ కీలక ప్రకటన చేశారు. మెగా డీఎస్సీ-2026 నోటిఫికేషన్ను 2026 అక్టోబర్ నెలలో విడుదల చేసి, నియామక పరీక్షలను అదే ఏడాది డిసెంబర్ నెలలో నిర్వహించనున్నట్లు వెల్లడించారు. తాజాగా నిర్వహించిన విలేకరుల సమావేశంలో ఆయన డీఎస్సీ-2025 నియామక ప్రక్రియతో పాటు భవిష్యత్ నియామకాలపై కూడా స్పష్టత ఇచ్చారు. రాష్ట్ర ప్రభుత్వం ఉపాధ్యాయ నియామకాల విషయంలో ఇచ్చిన హామీలను కచ్చితంగా అమలు చేస్తోందని, ఉద్యోగ క్యాలెండర్కు అనుగుణంగా ఖాళీల భర్తీ ప్రక్రియను కొనసాగిస్తోందని తెలిపారు.
డీఎస్సీ-2025 నియామకాలను పూర్తిస్థాయి పారదర్శకతతో నిర్వహించినట్లు కోన శశిధర్ పేర్కొన్నారు. నియామక ప్రక్రియలో ఎలాంటి అవకతవకలకు తావు లేకుండా ప్రభుత్వ నిబంధనలను కఠినంగా అమలు చేశామని వివరించారు. ఇటీవల సోషల్ మీడియాలో ప్రచారంలోకి వచ్చిన ఆరోపణలను ఆయన ఖండిస్తూ, సమాంతర రిజర్వేషన్లు, క్రీడాకోటా నియామకాలు, దివ్యాంగులకు కల్పించిన రిజర్వేషన్ల అమలులో ఎలాంటి లోపాలు జరగలేదని స్పష్టం చేశారు. ప్రతి అభ్యర్థికి సమాన అవకాశాలు కల్పించేలా నియామక ప్రక్రియను రూపొందించామని, అన్ని రిజర్వేషన్లను చట్టబద్ధంగా అమలు చేశామని తెలిపారు. అర్హులైన అభ్యర్థులకు న్యాయం జరిగే విధంగా మొత్తం ప్రక్రియను పర్యవేక్షించినట్లు వెల్లడించారు.
రాష్ట్రంలోని ప్రభుత్వ పాఠశాలల్లో ఉన్న ఖాళీ ఉపాధ్యాయ పోస్టులను భర్తీ చేయడమే లక్ష్యంగా మెగా డీఎస్సీ-2026ను నిర్వహిస్తున్నట్లు అధికారులు పేర్కొన్నారు. దీంతో ఉపాధ్యాయ ఉద్యోగాల కోసం సిద్ధమవుతున్న వేలాది మంది అభ్యర్థుల్లో కొత్త ఆశలు చిగురించాయి. ఇప్పటికే పోటీ పరీక్షలకు సిద్ధమవుతున్న అభ్యర్థులు ఈ అవకాశాన్ని సద్వినియోగం చేసుకోవాలని విద్యాశాఖ సూచించింది. అక్టోబర్లో నోటిఫికేషన్ విడుదల కానుండటంతో అభ్యర్థులు ఇప్పటి నుంచే తమ ప్రణాళికలను రూపొందించుకుని సన్నద్ధం కావాలని అధికారులు సూచిస్తున్నారు. రాష్ట్ర ప్రభుత్వం వరుసగా ఉపాధ్యాయ నియామకాలను చేపడుతుండటం నిరుద్యోగ యువతకు ఊరటనిచ్చే అంశంగా మారింది.
ALSO READ: ప్రాణాలు తీస్తున్న ఫోన్లు.. ప్రణవి విషయంలో ఏం జరిగింది?
