టాలీవుడ్ సీనియర్ నటి భానుప్రియ ఆరోగ్యం గురించి సోషల్ మీడియాలో వైరల్ అవుతున్న పుకార్లపై తాజాగా ఆమె సోదరి శాంతిప్రియ స్పందించారు. ఇటీవల ఇచ్చిన ఒక ఇంటర్వ్యూలో ఆమె మాట్లాడుతూ భానుప్రియ వ్యక్తిగత జీవితానికి సంబంధించిన పలు విషయాలను వెల్లడించారు. కొన్ని సినిమాల విషయంలో ఇచ్చిన మాటలు నిలబెట్టుకోకపోవడం వల్ల భానుప్రియ మానసికంగా బాధపడినట్లు తెలిపారు. ఆమెను సినిమాలకు ఆహ్వానించినప్పటికీ, చిత్రీకరణ సమయంలో కథలు, పాత్రలు మార్చడం వల్ల ఆమె నిరాశకు గురైనట్లు చెప్పారు. దాదాపు 280 సినిమాలు పూర్తి చేసి, అనేక అవార్డులు అందుకున్న నటి పట్ల ఇలాంటి ప్రవర్తన సరైంది కాదని ఆమె అభిప్రాయపడ్డారు.
భర్త మరణం అనంతరం భానుప్రియ కొంతకాలం తీవ్ర విషాదంలో ఉన్నారని శాంతిప్రియ పేర్కొన్నారు. అయితే ప్రస్తుతం ఆమె మానసిక స్థితి పూర్తిగా సవ్యంగానే ఉందని స్పష్టం చేశారు. ఇండస్ట్రీలో జరుగుతున్న 80ల రీయూనియన్ కార్యక్రమాలకు భానుప్రియను ఇప్పటివరకు ఎవరూ ఆహ్వానించలేదని కూడా ఆమె తెలిపారు. ఈ విషయంపై భానుప్రియ మాట్లాడకూడదని చెప్పినా, తాను నిజం చెప్పాల్సిన అవసరం ఉందని భావించి బయటపెడుతున్నానని పేర్కొన్నారు.
ఇకపై భానుప్రియ సినిమాల్లో నటించే ఆలోచనలో లేరని, అయితే తాను నటిగా కొనసాగుతున్నందుకు ఆనందంగా ఉందని శాంతిప్రియ చెప్పారు. తమ కుటుంబం గురించి ఎవరైనా సంప్రదించాలనుకుంటే తానో, తమ అన్నయ్యనో సంప్రదించవచ్చని వెల్లడించారు. పరిశ్రమలో తమ అన్నయ్యను చాలా మంది తెలుసని కూడా తెలిపారు.
సోషల్ మీడియాలో వస్తున్న తప్పుడు ప్రచారాలపై శాంతిప్రియ తీవ్ర అసంతృప్తి వ్యక్తం చేశారు. ఎలాంటి నిజం తెలియకుండా యూట్యూబ్ వంటి వేదికల్లో భానుప్రియపై అనవసర వ్యాఖ్యలు చేయొద్దని విజ్ఞప్తి చేశారు. అవసరమైతే చట్టపరమైన చర్యలు తీసుకునే అవకాశం ఉన్నప్పటికీ, ప్రస్తుతం అలాంటి ఆలోచన లేదని తెలిపారు. భానుప్రియకు మరో ఇల్లు ఉందని, ఆమె కూతురు లండన్లో చదువుకుంటోందని చెప్పారు. ఆమె అప్పుడప్పుడు అక్కడికి వెళ్తూ, మిగతా సమయాల్లో కుటుంబ సభ్యులతోనే ఉంటుందని స్పష్టం చేశారు. ప్రస్తుతం శాంతిప్రియ చేసిన ఈ వ్యాఖ్యలు సోషల్ మీడియాలో విస్తృతంగా చర్చకు దారితీస్తున్నాయి.
ALSO READ: నైట్రోజన్ సిలిండర్ పేలుడు.. నలుగురు మృతి