Focused mind - Crime Mirror

Ayyappa deeksha: అయ్యప్ప స్వామి మాల, మండల దీక్ష అనేవి కేవలం ఆధ్యాత్మికత, భక్తి, నియమ నిష్టలకు మాత్రమే పరిమితం కాకుండా, మన శరీరానికి, మనస్సుకు, జీవన విధానానికి ఎన్నో శాస్త్రీయ ప్రయోజనాలు అందించే అద్భుత సంప్రదాయాలు. కార్తీక మాసం మొదలుకొని మకర సంక్రాంతి వరకు అయ్యప్ప శరణుఘోషలు మారుమోగుతాయి. ఈ కాలం మొత్తం వీధుల్లో, దేవాలయాల్లో, యాత్రా మార్గాల్లో అన్నిచోట్లా నల్లని దుస్తులు ధరించిన మాలధారులు కనిపిస్తారు. వారందరూ పాటించే 41 రోజుల మండల దీక్షలో ప్రతి నియమం వెనుక భక్తి ఎంత ఉంటుందో, ఆరోగ్య శాస్త్రం అంతే ఉంటుంది. మన శరీరాన్ని శుద్ధి చేయడం, మనస్సును ప్రశాంతపరచడం, జీవన విధానాన్ని నియంత్రణలో ఉంచడం వంటి ఎన్నో ప్రయోజనాలు ఈ దీక్షతో స్వయంగా లభిస్తాయి. అయ్యప్ప మాల వేసుకున్న తరువాత మాలధారి నేలమీదనే నిద్రపోవాలి అన్న నియమం ఉంది. ఇది ప్రాచీన కాలంలో ఆధ్యాత్మిక పరంగా వినయానికి చిహ్నంగా పేర్కొనబడినా, శాస్త్రీయంగా చూస్తే ఇది వెన్ను కండరాలకు పెద్ద మేలు చేస్తుంది. గట్టిన నేలపై పడుకోవడం ద్వారా వెన్నుపూస సహజస్థితిలో ఉంచబడుతుంది. నరాల ఒత్తిడి తగ్గుతుంది. రక్తప్రసరణ సమంగా జరుగుతుంది. నిద్ర నాణ్యత మెరుగవుతుంది. నేటి ఆధునిక జీవితంలో మంచాలు, మెత్తెల కారణంగా ఏర్పడే వెన్నునొప్పి, నడుమునొప్పి వంటి సమస్యలు ఈ 41 రోజులలో గణనీయంగా తగ్గిపోతాయి. తెల్లవారుజామునే నిద్రలేచి చల్లటి నీటితో స్నానం చేయడం కూడా అయ్యప్ప దీక్షలో ముఖ్యమైన నియమం. ఈ శీతలస్నానం శరీర నాడీవ్యూహాన్ని ఉత్తేజితం చేస్తుంది. గుండె వేగం సరిగ్గా పనిచేయడానికి దోహదం చేస్తుంది. మెదడు మరింత చురుకుగా పనిచేయడానికి సహకరిస్తుంది. ఉదయం చల్లటి నీటితో స్నానం చేసిన వ్యక్తి ఆ రోజు మొత్తం ఉత్సాహంగా, తేలికగా, నిర్మలమైన మనస్సుతో ఉంటాడని శారీరక శాస్త్రం చెబుతుంది. స్నానం తర్వాత జరిగే దీపారాధన, ధూపదీపాల సువాసనలు మనస్సును సాంత్వన పరుస్తాయి. ఉదయం చేసుకునే పూజ ఆధ్యాత్మిక శాంతిని పెంచడమే కాక, మనస్సు ఒక విషయంపై కేంద్రీకరించుకునే శక్తిని పెంచుతుంది. అయ్యప్ప దీక్షలో మనుకుటుంబం, స్నేహితులు, సహదీక్షకులతో కలిసి ఉండటం ద్వారా ఒక విధమైన సామూహికశక్తి, క్రమశిక్షణ, పరస్పర గౌరవం పెంపొందుతుంది. ఒకే నియమాలు పాటించడం, కలిసి పూజలు చేయడం, కలిసి ప్రయాణించడం అన్నీ మనిషిని మరింత వినయవంతుడిని చేస్తాయి. ఈ సమయంలో భక్తుడు ఇతర భక్తులను “స్వామి” అని పిలవడం ద్వారా ప్రతి జీవిలో దేవుడున్నాడనే దృక్పథాన్ని పెంపొందించుకుంటాడు. ఇది మనసులో అహంకారాన్ని తొలగించి, సమానత్వాన్ని పెంచుతుంది. రోజుకు ఒకే పూట భోజనం చేసే “ఏకభుక్తం” కూడా దీక్షలో అతి ముఖ్యమైన భాగం. ఇది పేగులకు విశ్రాంతినిస్తుంది. జీర్ణవ్యవస్థను మెరుగుపరుస్తుంది. శరీరంలో ఉన్న విషపదార్థాలను బయటికి పంపిస్తుంది. ఈ సమయంలో మాంసాహారం, మద్యం, జంక్ ఫుడ్ పూర్తిగా నిషేధం కావడంతో శరీరం సహజంగా ఆరోగ్యవంతమవుతుంది. నెమ్మదిగా తినడం, మితాహారం పాటించడం వల్ల మెటాబాలిజం సరిగా పనిచేస్తుంది. బరువు తగ్గేందుకు కూడా ఇది సహకరిస్తుంది. పొగ తాగడం, మద్యం వంటి దుష్ట అలవాట్లు విరమించడం వల్ల ఊపిరితిత్తులు, కాలేయం, రక్తనాళాలు మరింత శుభ్రపడతాయి. నల్లని దుస్తులకు ప్రత్యేక ప్రాధాన్యం ఉంటుంది. అయ్యప్ప దీక్ష ఎక్కువగా శీతాకాలంలో జరిగేందున నల్ల దుస్తులు శరీర వేడిని కాపాడుతాయి. శాస్త్రీయంగా నల్ల రంగు వేడి గ్రహించి శరీరాన్ని మంచుగా ఉంచుతుంది. మరోవైపు శనిదేవుడికి నల్లని రంగు ప్రీతికరమైనది కాబట్టి, సానుకూల ప్రభావం కలుగుతుందని శాస్త్రాలు చెబుతాయి. అల్లాగే మాలగా రుద్రాక్ష, తులసి, చందన, స్పటికం వంటి పదార్థాలు ధార్మిక శక్తితో పాటు ఆరోగ్య శక్తిని కూడా కలిగి ఉంటాయి. రుద్రాక్ష రక్తపోటును నియంత్రిస్తుంది. తులసి శరీరానికి ఆక్సిజన్ను పెంచుతుంది. స్పటికం మనస్సును ప్రశాంతపరుస్తుంది. కనుబొమ్మల మధ్య ధరిస్తే గంధం “సుషుమ్నా నాడి”ని ఉత్తేజితం చేస్తుంది. ఇది జ్ఞానం, గమనశక్తి, ఆత్మసంపర్కానికి ప్రతీకగా చెప్పబడింది. మాల వేసుకోవడానికి ముందు కనీసం మూడు రోజులు పవిత్రంగా ఉండాలి అనే నియమం కూడా శారీరక, మానసిక శుద్ధిని సూచిస్తుంది. జుట్టు, గోళ్లు కట్ చేసుకోవడం, పరిశుభ్రత పాటించడం దీక్షలో ముఖ్యాంశాలు. అతి ముఖ్యంగా, కుటుంబసభ్యులు, భార్య అనుమతి తీసుకుని మాలధారణ చేయాలి అనే నియమం కుటుంబసౌఖ్యాన్ని కాపాడటానికి ఉద్దేశించబడింది. తల్లిదండ్రులు మరణిస్తే ఒక సంవత్సరం మాల ధరించకూడదు, భార్య మరణిస్తే ఆరు నెలలు దీక్ష చేపట్టకూడదు అనే నియమం కుటుంబ బాధ్యతలకు, శోకచర్యలకు ప్రాధాన్యమివ్వడం కోసం ఉంది. అంతటినీ కలిపి చూస్తే అయ్యప్ప మండల దీక్ష అనేది శరీరాన్ని, మనస్సును, ఆత్మను శుద్ధి చేసే ఆధ్యాత్మిక యోగా పద్ధతి. ఇది క్రమశిక్షణ నేర్పుతుంది. ఆలోచనలను అదుపులో ఉంచుతుంది. జీవన విధానాన్ని నియంత్రిస్తుంది. భక్తిని పెంచుతుంది. ఆరోగ్యాన్ని మెరుగుపరుస్తుంది. మనిషిని మరింత సమతుల్యంగా, సంతృప్తిగా, శాంతియుతంగా తీర్చిదిద్దుతుంది. ALSO READ: Chanakya Niti: ఉత్తమ భార్యకు ఉండాల్సిన లక్షణాలు ఇవే..

Tag: Focused mind

Most Read

తెలంగాణ రాష్ట్రంపై ఇంత కక్ష ఎందుకు..?

సిద్ధరామయ్య మరో మెలిక.. అధిష్టానం ముందు కీలక షరతులు.!

ప్లాస్టిక్ కరెన్సీ నోట్లు.. నకిలీ నోట్లకు చెక్ పెట్టే ఫీచర్లతో తీస్తున్న ఆర్బిఐ

ఖమ్మం, సూర్యాపేట, నల్గొండ కు రెడ్ అలర్ట్ జారీ…!

EDITOR PICKS

Ayyappa deeksha: అయ్యప్ప మాల వెనుక ఉన్న ఆరోగ్యం రహస్యం ఏంటో తెలుసా?

POPULAR POSTS

మునుగోడు ఆశ..రాజన్న శ్వాస..

డ్రైవింగ్ లైసెన్స్‌ నేరుగా ఇంటికే..!

RGV: బలవంతుడిదే రాజ్యం.. గెలిచిన వారి మతంలో చేరుతా!

POPULAR CATEGORY

ABOUT US

Trending Tags

WhatsApp Channel