కర్ణాటకలోని విజయపురాలో దారుణ ఘటన వెలుగులోకి వచ్చింది. వివాహేతర సంబంధానికి అడ్డుగా ఉన్నాడనే కారణంతో ఓ మహిళ తన ప్రియుడితో కలిసి భర్తను హత్య చేయించినట్లు పోలీసుల విచారణలో వెల్లడైంది. భర్త మరణాన్ని రోడ్డు ప్రమాదంగా చిత్రీకరించి తప్పించుకోవాలని ప్రయత్నించినప్పటికీ, పోలీసుల దర్యాప్తులో అసలు విషయం బయటపడింది.
కొత్త ఇంటి నిర్మాణంతో మొదలైన పరిచయం..
విజయపురాకు చెందిన రాజశేఖర్ (42), అశ్విని (30) దంపతులకు ఇద్దరు కుమారులు ఉన్నారు. సుమారు ఏడు నెలల క్రితం వీరు కొత్త ఇంటిని నిర్మించుకున్నారు. ఆ ఇంటికి రంగులు వేసే కాంట్రాక్టును కల్లూర్ అనే వ్యక్తికి అప్పగించారు. ఈ క్రమంలో అశ్వినికి కల్లూర్‌తో పరిచయం ఏర్పడింది. అది క్రమంగా వివాహేతర సంబంధానికి దారితీసినట్లు పోలీసుల విచారణలో తేలింది.
భర్తను తొలగించేందుకు పథకం..
తమ సంబంధానికి భర్త రాజశేఖర్ అడ్డుగా ఉన్నాడని భావించిన అశ్విని, కల్లూర్‌తో కలిసి అతడిని హత్య చేయాలని పథకం రచించినట్లు పోలీసులు గుర్తించారు. ఈ క్రమంలో అక్టోబర్ 4న రాజశేఖర్ వాకింగ్‌కు వెళ్లిన సమయంలో కారుతో ఢీకొట్టించి హత్య చేసినట్లు దర్యాప్తులో వెల్లడైంది.
పోలీసుల విచారణలో బయటపడిన నిజం..
ఈ ఘటనను రోడ్డు ప్రమాదంగా చూపిస్తూ తన భర్త ప్రమాదంలోనే మరణించాడని అశ్విని నమ్మించే ప్రయత్నం చేసినట్లు సమాచారం. అయితే కేసు దర్యాప్తు సందర్భంగా పోలీసులకు ఆమెపై అనుమానం కలిగింది. దీంతో ఆమెను విచారించగా, ప్రియుడితో కలిసి భర్త హత్యకు పథకం వేసిన విషయం వెలుగులోకి వచ్చినట్లు తెలిసింది.
ఈ కేసులో అశ్విని, కల్లూర్‌తో పాటు హత్యకు సహకరించిన మరో ఇద్దరిని పోలీసులు అరెస్ట్ చేశారు. ఈ ఘటన స్థానికంగా కలకలం రేపింది. కుటుంబ కలహాలు, వివాహేతర సంబంధాల నేపథ్యంలో చోటుచేసుకున్న ఈ ఘటనపై పోలీసులు తదుపరి దర్యాప్తు కొనసాగిస్తున్నారు.
also read: జోగి రమేష్ కోడలి కారు ప్రమాదం…!