రేషన్ కార్డు ఉందా? ఐతే ఈ గొప్ప ఛాన్స్ మిస్ కాకండి..!

• రేషన్ కార్డు ఉందా? ఐతే ఈ గొప్ప ఛాన్స్ మిస్ కాకండి

• ఉచిత శిక్షణతో స్వయం ఉపాధికి అవకాశం

Crime Mirror, Telangana State Bureau: రేషన్ కార్డు కలిగిన కుటుంబాలకు, ముఖ్యంగా నిరుద్యోగ యువతీ యువకులు మరీ ముఖ్యంగా మహిళలకు ఒక మంచి అవకాశాన్ని ప్రభుత్వం మద్దతుతో అందిస్తున్నారు. స్వయం ఉపాధి సాధించాలని భావిస్తున్న వారికి నైపుణ్యాలను పెంపొందించేందుకు ప్రత్యేకంగా ఉచిత శిక్షణ కార్యక్రమాలు నిర్వహిస్తున్నారు.

రాజన్న సిరిసిల్ల జిల్లాలోని గ్రామీణ ప్రాంతాల అభివృద్ధిని దృష్టిలో ఉంచుకుని యూనియన్ బ్యాంక్ రూరల్ స్వయం ఉపాధి శిక్షణ సంస్థ ఆధ్వర్యంలో ఈ శిక్షణ కార్యక్రమాలు ప్రారంభం కానున్నాయి. జూన్ 5వ తేదీ నుంచి ఈ తరగతులు ప్రారంభమవుతాయని సంస్థ ప్రతినిధులు వెల్లడించారు. నిరుద్యోగులను నైపుణ్యవంతులుగా తీర్చిదిద్దడం ప్రధాన లక్ష్యంగా ఈ కార్యక్రమాన్ని రూపొందించారు.

ప్రస్తుతం మార్కెట్‌లో మంచి డిమాండ్ ఉన్న పలు రంగాల్లో 14 రోజుల పాటు ఉచిత శిక్షణ ఇవ్వనున్నారు. ముఖ్యంగా సీసీటీవీ కెమెరా టెక్నీషియన్, సెక్యూరిటీ అలారం మరియు స్మోక్ డిటెక్టర్ ఇన్‌స్టాలేషన్, మెయింటెనెన్స్ వంటి టెక్నికల్ కోర్సులతో పాటు మహిళలకు అనువైన ఇమిటేషన్ జ్యువెలరీ తయారీ వంటి కోర్సులు అందుబాటులో ఉన్నాయి.

ఈ శిక్షణ పూర్తిగా ఉచితం కావడం ముఖ్యమైన విషయం. అభ్యర్థులకు ఎలాంటి ఫీజులు ఉండవు. శిక్షణ కాలంలో వసతి మరియు భోజన సౌకర్యాన్ని కూడా సంస్థ ఉచితంగా కల్పిస్తుంది. దీంతో ఆర్థిక ఇబ్బందులు లేకుండా అభ్యర్థులు శిక్షణపై దృష్టి పెట్టే అవకాశం ఉంటుంది.

శిక్షణ పూర్తి చేసిన వారికి ప్రభుత్వ గుర్తింపు పొందిన సర్టిఫికెట్లు అందజేస్తారు. అదేవిధంగా స్వయం ఉపాధి ప్రారంభించేందుకు మార్గదర్శకత్వం ఇవ్వడంతో పాటు బ్యాంకు రుణాల కోసం సహకారం కూడా అందిస్తారు.

ఈ శిక్షణకు దరఖాస్తు చేసుకునే అభ్యర్థుల వయస్సు 19 నుండి 50 సంవత్సరాల మధ్య ఉండాలి. కనీసం 10వ తరగతి ఉత్తీర్ణత అవసరం. రాజన్న సిరిసిల్ల జిల్లా గ్రామీణ ప్రాంత నివాసితులు మాత్రమే అర్హులు. ఇంటర్వ్యూకు హాజరయ్యే సమయంలో టెన్త్ మెమో, ఆధార్ కార్డు, రేషన్ కార్డు ప్రతులు, రెండు పాస్‌పోర్ట్ సైజు ఫోటోలు తీసుకు వెళ్ళాలి.

శిక్షణ కేంద్రం… సిరిసిల్ల పట్టణంలోని నెహ్రూ నగర్‌లో, యూనియన్ బ్యాంక్ గోపాల్ నగర్ బ్రాంచ్ ఎదురుగా ఉంది. ఆసక్తి గల అభ్యర్థులు నేరుగా కేంద్రానికి వెళ్లి తమ పేర్లు నమోదు చేసుకోవచ్చు. సీట్లు పరిమితంగా ఉన్నందున ముందుగానే నమోదు చేసుకోవడం మంచిది.

మరిన్ని వివరాల కోసం ఈ ఫోన్ నంబర్లను సంప్రదించవచ్చు:
84650 92835, 99512 22306, 94900 91770, 89853 74672

భవిష్యత్తులో ఈ సంస్థ ద్వారా మరిన్ని కోర్సులు కూడా అందించనున్నారు. టైలరింగ్, మగ్గం పనులు, జూట్ బ్యాగ్ తయారీ, బ్యూటీషియన్ ట్రైనింగ్, ఫోటోగ్రఫీ, వీడియోగ్రఫీ వంటి కోర్సులతో పాటు పచ్చళ్లు, మసాలా తయారీ, పుట్టగొడుగుల పెంపకం, ఏసీ రిపేర్, డ్రైవింగ్, పాడి పరిశ్రమ, వర్మికాంపోస్ట్ తయారీ వంటి విభాగాల్లో కూడా ఉచిత శిక్షణ అందించనున్నారు.

ఈ అవకాశాన్ని ఉపయోగించుకుని స్వయం ఉపాధి దిశగా అడుగులు వేయాలనే ఆసక్తి గలవారికి ఇది ఒక మంచి అవకాశం.