ప్రముఖ నటుడు విజయ్ స్థాపించిన తమిళగ వెట్రి కళగం (టీవీకే)కు ఎన్నికల పరంగా కీలక గుర్తింపు లభించింది. తమిళనాడులో టీవీకేను రాష్ట్ర పార్టీగా భారత ఎన్నికల సంఘం (ఈసీఐ) అధికారికంగా గుర్తించింది. అంతేకాకుండా పార్టీకి ‘విజిల్’ ఎన్నికల గుర్తును శాశ్వతంగా కేటాయించింది.
2026 తమిళనాడు అసెంబ్లీ ఎన్నికల్లో టీవీకే తొలిసారి పోటీ చేసింది. మొత్తం 234 అసెంబ్లీ స్థానాల్లో 108 సీట్లు గెలుచుకుని అతిపెద్ద పార్టీగా నిలిచింది. రాష్ట్రవ్యాప్తంగా 34.92 శాతం ఓట్లను సాధించింది. దీంతో రాష్ట్ర పార్టీ హోదాకు అవసరమైన ఎన్నికల నిబంధనలను టీవీకే అధిగమించింది.
ఎన్నికలకు ముందు టీవీకేకు ‘విజిల్’ గుర్తును ఉమ్మడి ఎన్నికల గుర్తుగా కేటాయించారు. ఎన్నికల్లో పార్టీ సాధించిన ఫలితాలను పరిగణనలోకి తీసుకున్న ఈసీ.. తాజాగా అదే గుర్తును శాశ్వత ఎన్నికల గుర్తుగా ఖరారు చేసింది. దీంతో ఇకపై జరిగే ఎన్నికల్లో టీవీకే ‘విజిల్’ గుర్తుతోనే బరిలోకి దిగే అవకాశం ఏర్పడింది.
తాజా నిర్ణయంతో తమిళనాడులో రాష్ట్ర పార్టీగా గుర్తింపు పొందిన పార్టీల జాబితాలో టీవీకే కూడా చేరింది. ఇప్పటికే గుర్తింపు పొందిన ప్రధాన పార్టీలతో పాటు టీవీకేకు ఈ హోదా రావడం విజయ్ రాజకీయ ప్రస్థానంలో కీలక పరిణామంగా మారింది. తొలి ఎన్నికల్లోనే గణనీయమైన ఓటు శాతం, భారీ సంఖ్యలో అసెంబ్లీ స్థానాలు సాధించిన నేపథ్యంలో తమిళ రాజకీయాల్లో టీవీకే మరింత కీలక శక్తిగా ఎదిగే అవకాశం కనిపిస్తోంది.
also read: టీడీపీ కార్యకర్త హత్య కేసులో కీలక పరిణామం.. కోర్టులో లొంగిపోయిన వైసీపీ నేత