యువ కథానాయకుడు తేజ సజ్జా తన వివాహంపై వస్తున్న వార్తలకు స్పష్టత ఇచ్చారు. త్వరలోనే వైవాహిక జీవితంలోకి అడుగుపెట్టనున్నట్లు వెల్లడించారు. డిసెంబర్‌లో రాజస్థాన్‌లోని ఉదయ్‌పుర్ వేదికగా తన పెళ్లి వేడుక జరగనుందని తెలిపారు. ఇప్పటికే పెళ్లి ఏర్పాట్లకు సంబంధించిన విషయాలు ఆసక్తికరంగా మారాయి.
నవంబర్‌లో నిశ్చితార్థం.. డిసెంబర్‌లో పెళ్లి
తేజ సజ్జా వెల్లడించిన వివరాల ప్రకారం.. నవంబర్‌లో నిశ్చితార్థ వేడుక నిర్వహించనున్నారు. అనంతరం డిసెంబర్‌లో ఉదయ్‌పుర్‌లో డెస్టినేషన్ వెడ్డింగ్ జరగనుంది. కుటుంబ సభ్యులు, అత్యంత సన్నిహితుల సమక్షంలో ఈ వివాహ వేడుకను నిర్వహించాలని నిర్ణయించినట్లు తెలుస్తోంది. పెళ్లి అనంతరం హైదరాబాద్లో ప్రత్యేకంగా రిసెప్షన్ ఏర్పాటు చేయనున్నారు.
పెద్దలు కుదిర్చిన వివాహం
తనది ప్రేమ వివాహం కాదని, పెద్దలు కుదిర్చిన సంబంధమని తేజ సజ్జా స్పష్టం చేశారు. కాబోయే జీవిత భాగస్వామి కుటుంబానికి సినీ పరిశ్రమతో ఎలాంటి సంబంధం లేదని వివరించారు. వారు టెక్నాలజీ వ్యాపార రంగంలో ఉన్నారని వెల్లడించారు. దీంతో తేజ సజ్జా జీవిత భాగస్వామి ఎవరనే అంశంపై అభిమానుల్లో ఆసక్తి నెలకొంది.
పెళ్లి వేడుక కోసం అభిమానుల ఎదురుచూపులు
విభిన్నమైన కథలను ఎంచుకుంటూ యువ కథానాయకుడిగా తనకంటూ ప్రత్యేక గుర్తింపు తెచ్చుకున్న తేజ సజ్జా.. ఇప్పుడు వ్యక్తిగత జీవితంలో కొత్త అధ్యాయాన్ని ప్రారంభించేందుకు సిద్ధమవుతున్నారు. ఉదయ్‌పుర్‌లో జరగనున్న డెస్టినేషన్ వెడ్డింగ్, హైదరాబాద్లో నిర్వహించనున్న రిసెప్షన్ విశేషాల కోసం అభిమానులు ఎదురుచూస్తున్నారు.
also read: హాలీవుడ్‌లో సినిమా చేయడమే నా కోరిక.. ‘వారణాసి’ తర్వాతే ఆలోచిస్తా: రాజమౌళి