ఆంధ్రప్రదేశ్లో కొత్త విద్యా సంవత్సరానికి రంగం సిద్ధమైంది. రాష్ట్ర వ్యాప్తంగా ప్రభుత్వ, ప్రైవేట్ పాఠశాలలు శుక్రవారం జూన్ 12 నుంచి పునఃప్రారంభం కానుండటంతో 2026-27 విద్యా సంవత్సరం అధికారికంగా ప్రారంభం కానుంది. వేసవి సెలవుల అనంతరం లక్షలాది మంది విద్యార్థులు మళ్లీ పాఠశాలల బాట పట్టనుండగా, విద్యాశాఖ ఇప్పటికే కొత్త విద్యా సంవత్సరానికి సంబంధించిన అకడమిక్ క్యాలెండర్ను విడుదల చేసింది. ఈసారి విద్యా సంవత్సరంలో బోధన, పరీక్షలు, సెలవులు, ప్రత్యేక కార్యక్రమాలకు సంబంధించిన పూర్తి ప్రణాళికను సిద్ధం చేశారు.
విద్యాశాఖ విడుదల చేసిన అకడమిక్ క్యాలెండర్ ప్రకారం 2026-27 విద్యా సంవత్సరంలో మొత్తం 229 పనిదినాలు, 87 సెలవు దినాలు ఉండనున్నాయి. వీటితో పాటు 5 ఐచ్ఛిక సెలవులు, 3 స్థానిక సెలవులు కూడా అందుబాటులో ఉంటాయి. విద్యా ప్రమాణాలను మరింత మెరుగుపర్చే లక్ష్యంతో ప్రతి ఉపాధ్యాయుడు వారానికి కనీసం 24 పీరియడ్లు, గరిష్టంగా 30 పీరియడ్లు బోధించాల్సి ఉంటుందని విద్యాశాఖ స్పష్టం చేసింది. విద్యార్థులపై పుస్తకాల భారం తగ్గించేందుకు రాష్ట్రంలోని అన్ని పాఠశాలల్లో ప్రతి శనివారాన్ని ‘నో బ్యాగ్ డే’గా నిర్వహించనున్నారు. ఆ రోజున విద్యార్థులకు పుస్తకాలు, హోంవర్క్లకు బదులుగా సృజనాత్మక కార్యక్రమాలు, క్రీడలు, జీవన నైపుణ్యాలకు సంబంధించిన కార్యకలాపాలు నిర్వహించనున్నారు.
ఈ విద్యా సంవత్సరంలో పదో తరగతి విద్యార్థులకు అత్యంత కీలకమైన పబ్లిక్ పరీక్షలు 2027 మార్చి 15 నుంచి మార్చి 31 వరకు నిర్వహించనున్నట్లు క్యాలెండర్లో పేర్కొన్నారు. పరీక్షల షెడ్యూల్ను దృష్టిలో ఉంచుకుని విద్యార్థులు ముందుగానే ప్రణాళికాబద్ధంగా సిద్ధం కావాలని అధికారులు సూచిస్తున్నారు.
సెలవుల విషయానికి వస్తే ఈసారి దసరా, క్రిస్మస్, సంక్రాంతి పండుగల సందర్భంగా ప్రత్యేక విరామాలు కల్పించారు. దసరా సెలవులు 2026 అక్టోబర్ 12 నుంచి అక్టోబర్ 21 వరకు కొనసాగనున్నాయి. అయితే మైనారిటీ పాఠశాలలకు అక్టోబర్ 15 నుంచి అక్టోబర్ 21 వరకు మాత్రమే దసరా సెలవులు ఉంటాయి. క్రిస్మస్ సందర్భంగా సాధారణ పాఠశాలలకు 2026 డిసెంబర్ 25న ఒక రోజు సెలవు ఉండగా, మైనారిటీ పాఠశాలలకు డిసెంబర్ 20 నుంచి డిసెంబర్ 27 వరకు సెలవులు ప్రకటించారు. సంక్రాంతి పండుగకు 2027 జనవరి 11 నుంచి జనవరి 17 వరకు సెలవులు ఇవ్వనుండగా, మైనారిటీ పాఠశాలలకు జనవరి 13 నుంచి జనవరి 17 వరకు మాత్రమే వర్తిస్తాయి.
ఈ విద్యా సంవత్సరంలో విద్యార్థుల అవగాహన, సామాజిక బాధ్యత, శాస్త్రీయ దృక్పథం పెంపొందించే లక్ష్యంతో పలు కొత్త దినోత్సవాలను కూడా విద్యాశాఖ చేర్చింది. ఇప్పటికే అమలులో ఉన్న 12 దినోత్సవాలకు అదనంగా మరో 10 ప్రత్యేక దినోత్సవాలను చేర్చడం విశేషం. జూన్ 21న అంతర్జాతీయ యోగా దినోత్సవం, జూన్ 26న మాదకద్రవ్యాల వ్యతిరేక దినోత్సవం, జులై 11న ప్రపంచ జనాభా దినోత్సవం, ఆగస్టు 23న జాతీయ అంతరిక్ష దినోత్సవం, నవంబర్ 11న జాతీయ విద్యా దినోత్సవం, నవంబర్ 26న రాజ్యాంగ దినోత్సవం, జనవరి 3న సావిత్రిబాయి ఫులే జయంతి సందర్భంగా జాతీయ మహిళా ఉపాధ్యాయుల దినోత్సవం, జనవరి 25న జాతీయ ఓటర్ల దినోత్సవం, ఫిబ్రవరి 13న సరోజిని నాయుడు జయంతి సందర్భంగా ఆంగ్ల భాషా దినోత్సవం, ఏప్రిల్ 22న ప్రపంచ ధరిత్రీ దినోత్సవాన్ని రాష్ట్రంలోని అన్ని పాఠశాలల్లో నిర్వహించనున్నారు.
కొత్త విద్యా సంవత్సరం ప్రారంభం నేపథ్యంలో విద్యార్థులు, తల్లిదండ్రులు, ఉపాధ్యాయులు అకడమిక్ క్యాలెండర్ను ముందుగానే పరిశీలించి తమ ప్రణాళికలను సిద్ధం చేసుకోవాలని విద్యాశాఖ సూచించింది. విద్యతో పాటు వ్యక్తిత్వ వికాసం, సామాజిక అవగాహన, ఆరోగ్యకరమైన జీవన విధానంపై దృష్టి సారించేలా ఈసారి విద్యా సంవత్సరం రూపొందించబడిందని అధికారులు తెలిపారు.
