సినిమా ఇండస్ట్రీలో హీరోయిన్లకు అవకాశాలు ఎక్కువకాలం ఉండవనే అభిప్రాయం చాలా కాలంగా ఉంది. అందుకే చాలామంది నటీమణులు ఎక్కువ సినిమాలు చేస్తూ స్టార్ డమ్ ను నిలబెట్టుకోవాలని చూస్తుంటారు. అయితే కొందరు మాత్రమే గ్లామర్ కంటే నటనకు ప్రాధాన్యం ఇస్తూ, విభిన్నమైన పాత్రలను ఎంచుకుంటారు. అలాంటి హీరోయిన్లలో అనుపమ పరమేశ్వరన్ ఒకరు.
నటనకు అవకాశం ఉన్న పాత్రలపై దృష్టి
కెరీర్ ప్రారంభం నుంచే అనుపమ కథలో ప్రాధాన్యం ఉన్న పాత్రలనే ఎంచుకుంటూ వస్తోంది. కమర్షియల్ సినిమాల్లో హీరోయిన్ పాత్ర కేవలం పాటలు, గ్లామర్కే పరిమితం అయ్యే పరిస్థితి ఉన్నప్పటికీ, ఆమె మాత్రం నటనకు అవకాశం ఉన్న పాత్రలపై దృష్టి పెడుతోంది. ఇటీవల కొన్ని సినిమాలు ఆశించిన స్థాయిలో విజయం సాధించకపోయినా, ఆమె తన ఎంపికల్లో ఎలాంటి మార్పు చేయలేదు.
‘మరీచిక’లో డీ గ్లామరైజ్డ్ పాత్ర
తాజాగా విడుదలైన ‘మరీచిక’ సినిమాలో అనుపమ నటనకు మంచి ప్రశంసలు లభిస్తున్నాయి. ఈ చిత్రంలో ఆమె రెండు విభిన్నమైన కోణాలు ఉన్న పాత్రలో కనిపించింది. ఒకవైపు స్టైలిష్, మోడ్రన్ లుక్లో ఆకట్టుకోగా, మరోవైపు పూర్తిగా డీ గ్లామరైజ్డ్ పాత్రలో నటించి ప్రేక్షకులను మెప్పించింది. అందంతో పాటు నటనలోనూ తాను ప్రత్యేకమని మరోసారి నిరూపించుకుంది. ఒక స్టార్ హీరోయిన్ ఇలాంటి సవాల్తో కూడిన పాత్రను చేయడం అంత సులభం కాదు. కానీ అనుపమ మాత్రం పాత్ర కోసం తన లుక్ను పూర్తిగా మార్చుకోవడానికి కూడా వెనుకాడలేదు. అందుకే ఆమె నటనను సినీ అభిమానులు, విమర్శకులు ప్రశంసిస్తున్నారు.
గతంలోనూ ఇదే పద్దతి..
ఇక ఆమె గత చిత్రాలను పరిశీలిస్తే కూడా ఇదే విషయం స్పష్టమవుతుంది. ‘కార్తికేయ-2’లో కీలక పాత్రతో గుర్తింపు పొందిన అనుపమ, ‘టిల్లు స్క్వేర్’లో పూర్తిగా భిన్నమైన పాత్రలో కనిపించింది. అలాగే ‘పరదా’, ‘కిష్కిందపురి’, ‘బైసన్’, ‘లాక్డౌన్’, ‘జానకి వర్సెస్ స్టేట్ ఆఫ్ కేరళ’ వంటి సినిమాల్లోనూ విభిన్నమైన పాత్రలను పోషించింది. ప్రస్తుతం చాలా మంది హీరోయిన్లు సేఫ్ జోన్లో ఉండే పాత్రలను ఎంచుకుంటుంటే, అనుపమ మాత్రం నటిగా తన ప్రతిభను చూపించే కథల వైపు అడుగులు వేస్తోంది. ఇదే ఆమెను ఇతర హీరోయిన్ల నుంచి ప్రత్యేకంగా నిలబెడుతోంది. భవిష్యత్తులో కూడా ఇలాంటి వైవిధ్యమైన పాత్రలతో ప్రేక్షకులను అలరించే అవకాశం ఉందని సినీ వర్గాలు భావిస్తున్నాయి.
