ఆఫ్రికన్ ఖండంలోని ప్రముఖ దేశమైన నైజీరియాలోని ఎడో కమ్యూనిటీకి చెందిన ఒక సంప్రదాయ వివాహ ఆచారం ప్రస్తుతం సోషల్ మీడియాలో విస్తృతంగా చర్చకు దారి తీస్తోంది. అక్కడ జరిగిన ఓ పెళ్లి వేడుకకు సంబంధించిన వీడియో వైరల్ కావడంతో ప్రపంచవ్యాప్తంగా ఉన్న నెటిజన్లు ఆశ్చర్యం, ఆసక్తితో ఆ ఆచారాన్ని గమనిస్తున్నారు. ఈ సంప్రదాయం భారతీయ వివాహ పద్ధతులకు పూర్తిగా భిన్నంగా ఉండటంతో చాలామందిని ఆకట్టుకుంటోంది.
EDO culture. Can any Edo person tell us the reason behind this tradition? pic.twitter.com/LLzWEG8RXI
— Sabi Radio (@sabiradioonline) October 6, 2023
ఈ వివాహ ఆచారంలో అత్యంత ప్రత్యేకమైన అంశం నవ వధువు చేయాల్సిన ఆచరణ. పెళ్లి వేడుక ప్రారంభంలో వధువు ముందుగా తన భర్త తండ్రి, అంటే మామ ఒడిలో ఏడుసార్లు కూర్చోవాలి. ఈ ప్రక్రియకు అక్కడి సమాజంలో ఎంతో లోతైన భావార్ధం ఉంది. వరుడి తండ్రి తన ఒడిలో వధువును కూర్చోబెట్టుకోవడం ద్వారా ఆమెను తన సొంత కుమార్తెగా అధికారికంగా అంగీకరిస్తున్నానన్న సంకేతాన్ని ఇస్తారు. ఇది కేవలం సంప్రదాయం మాత్రమే కాకుండా.. కుటుంబ ఐక్యత, పరస్పర గౌరవానికి ప్రతీకగా ఎడో ప్రజలు భావిస్తారు.
వధువు మామ ఒడిలో ఏడుసార్లు కూర్చోవడం పూర్తయ్యాక తదుపరి దశ మొదలవుతుంది. ఆ తర్వాత వధువును వరుడి ఒడిలో కూర్చోబెడతారు. ఈ క్షణంతోనే వివాహ తంతు పూర్తయినట్టుగా ఎడో కమ్యూనిటీలో భావిస్తారు. కుటుంబ పెద్దల సమక్షంలో జరిగే ఈ ఆచారం ద్వారా వధువు కొత్త కుటుంబంలోకి అధికారికంగా ప్రవేశించినట్టుగా గుర్తిస్తారు.
ఈ వీడియో సోషల్ మీడియాలో వైరల్ కావడంతో నెటిజన్లు విభిన్న అభిప్రాయాలు వ్యక్తం చేస్తున్నారు. కొందరు దీనిని సంప్రదాయాల గొప్పతనంగా ప్రశంసిస్తుండగా, మరికొందరు ఆశ్చర్యంతో పాటు ఆసక్తి వ్యక్తం చేస్తున్నారు. ప్రతి దేశానికి, ప్రతి సమాజానికి ప్రత్యేకమైన ఆచారాలు ఉంటాయని, వాటిని వారి సాంస్కృతిక నేపథ్యంతో అర్థం చేసుకోవాల్సిన అవసరం ఉందని పలువురు వ్యాఖ్యానిస్తున్నారు.
ఎడో కమ్యూనిటీ వివాహ ఆచారాలు అక్కడి కుటుంబ వ్యవస్థను, పెద్దల పాత్రను స్పష్టంగా చూపిస్తాయి. ముఖ్యంగా అత్తమామల ఆశీర్వాదం, కుటుంబ అంగీకారం ఎంత ముఖ్యమో ఈ సంప్రదాయం తెలియజేస్తుంది. సోషల్ మీడియా కారణంగా ఇలాంటి అరుదైన ఆచారాలు ప్రపంచానికి చేరుతున్నాయని, ఇది సాంస్కృతిక అవగాహనకు దోహదపడుతోందని విశ్లేషకులు అభిప్రాయపడుతున్నారు.
ALSO READ: మేటిచందాపూర్ ఘటనపై బిఆర్ఎస్ కఠిన నిర్ణయం
