Shocking: ఉత్తరప్రదేశ్లోని దేవరియా జిల్లాలో చోటుచేసుకున్న ఓ విచిత్రమైన ఘటన దేశవ్యాప్తంగా చర్చకు దారి తీసింది. చిన్నారి అమాయకత్వాన్ని అడ్డుపెట్టుకుని కొందరు వ్యాపారులు చేసిన మోసం ఒక కుటుంబాన్ని రోడ్డున పడేసినట్లుగా మారింది. కేవలం మోమోలపై ఉన్న ఇష్టంతో ఏడో తరగతి చదువుతున్న ఓ బాలుడు చేసిన పని ఏకంగా రూ.85 లక్షల విలువైన కుటుంబ ఆభరణాలు చేతులారా ఇతరులకు అప్పగించే పరిస్థితికి దారి తీసింది. ఈ ఘటన వెలుగులోకి రావడంతో తల్లిదండ్రులు, సమాజం మొత్తం ఒక్కసారిగా ఉలిక్కిపడ్డాయి.
పోలీసుల వివరాల ప్రకారం.. వారణాసిలోని ఓ దేవాలయంలో అర్చకుడిగా పని చేస్తున్న విమలేష్ మిశ్రా కుటుంబం ఈ ఘటనకు కేంద్రబిందువుగా మారింది. ఆయన కుమారుడు స్థానికంగా ఉన్న ఓ మోమో స్టాల్కు తరచుగా వెళ్లి చిరుతిండి తినేవాడు. మోమోలు అంటే ఆ బాలుడికి ఎంతో ఇష్టమని గుర్తించిన ముగ్గురు స్టాల్ యజమానులు, అతడి అమాయకత్వాన్ని ఆసరాగా చేసుకుని ఒక పథకం రూపొందించినట్లు తెలుస్తోంది. “నువ్వు ఇంటి నుంచి నగలు తీసుకొస్తే.. నీకు రోజూ ఉచితంగా మోమోలు ఇస్తాం” అంటూ మాయమాటలు చెప్పి చిన్నారిని తమ వలలో పడేసినట్లు పోలీసులు గుర్తించారు.
డబ్బు విలువ, బంగారం విలువ ఏంటో తెలియని వయసులో ఉన్న ఆ బాలుడు వారి మాటలను నమ్మేశాడు. ఇంట్లో ఎవరికీ తెలియకుండా బీరువా తెరిచి, ఒక్కో నగను తీసుకెళ్లి ఆ మోమో విక్రేతలకు ఇవ్వడం మొదలుపెట్టాడు. ప్రతిరోజూ ఏదో ఒక ఆభరణాన్ని తీసుకెళ్లి, తనకు నచ్చిన మోమోలు తింటూ వచ్చాడు. వ్యాపారులు కూడా ఉచితంగా ఇస్తున్నామంటూ నటిస్తూ, నిజానికి చిన్నారిని పూర్తిగా దోచుకున్నారని పోలీసులు చెబుతున్నారు. ఈ వ్యవహారం చాలా కాలం పాటు కుటుంబ సభ్యులకు ఏమాత్రం అనుమానం రాకుండా సాగిపోయింది.
అయితే ఇటీవల విమలేష్ మిశ్రా సోదరి వారి ఇంటికి రావడంతో అసలు విషయం వెలుగులోకి వచ్చింది. ఆమె తన నగలు కావాలని అడగడంతో కుటుంబ సభ్యులు బీరువా తెరిచి చూడగా లోపల ఒక్క బంగారు ఆభరణం కూడా కనిపించలేదు. ఏమైందో అర్థం కాక ఆందోళనకు గురైన కుటుంబ సభ్యులు, చివరకు తమ కుమారుడిని ప్రశ్నించారు. అప్పుడప్పుడూ నువ్వు బీరువా తెరుస్తున్నావు కదా.. నగలు తీసావా? అని అడగగా, ఆ బాలుడు చెప్పిన సమాధానం విని అందరూ షాక్కు గురయ్యారు. “నాకు ఉచితంగా మోమోలు ఇస్తామని చెప్పారు. అందుకే వారికి నగలు ఇచ్చాను” అని అమాయకంగా చెప్పడంతో కుటుంబ సభ్యులు స్పృహ తప్పినంత పని అయింది. అప్పటికే సుమారు రూ.85 లక్షల విలువైన బంగారు ఆభరణాలు ఆ మోమో విక్రేతల చేతుల్లోకి వెళ్లిపోయినట్లు తేలింది.
ఈ ఘటనపై వెంటనే స్పందించిన విమలేష్ మిశ్రా.. తన కుమారుడి అమాయకత్వాన్ని ఆసరాగా చేసుకుని భారీ దోపిడీకి పాల్పడ్డ ముగ్గురు నిందితులపై పోలీసులకు రాతపూర్వక ఫిర్యాదు చేశారు. ఫిర్యాదులో నిందితుల పేర్లను కూడా పేర్కొనడంతో పోలీసులు కేసు నమోదు చేసి దర్యాప్తు ప్రారంభించారు. ప్రస్తుతం ఆభరణాలను రికవరీ చేయడానికి ప్రత్యేక బృందాలు రంగంలోకి దిగినట్లు సమాచారం. చిన్నారిని ప్రలోభపెట్టి ఇంతటి ఖరీదైన ఆభరణాలను తీసుకోవడం చట్టరీత్యా తీవ్రమైన నేరమని పోలీసులు స్పష్టం చేశారు.
ఈ ఘటన సోషల్ మీడియాలో వైరల్ కావడంతో నెటిజన్లు విస్తృతంగా స్పందిస్తున్నారు. పిల్లల ఆహారపు అలవాట్లు, వారు ఎవరితో తిరుగుతున్నారు, ఎక్కడికి వెళ్తున్నారు అనే విషయాలపై తల్లిదండ్రులు నిరంతరం దృష్టి పెట్టాలని పలువురు సూచిస్తున్నారు. చిన్న వయసులోనే డబ్బు, బంగారం విలువ గురించి అవగాహన కల్పించకపోతే ఇలాంటి మోసగాళ్ల చేతికి పిల్లలు చిక్కే ప్రమాదం ఉందని హెచ్చరిస్తున్నారు.
ALSO READ: Phone Tapping Case: సిట్ విచారణకు కేసీఆర్.. కవిత ఏమన్నారంటే?