Panchayat Elections: ప్రశాంతంగా జరగాల్సిన పంచాయితీ ఎన్నికలు ఓ కుటుంబంలో ఊహించని విషాదానికి దారి తీసింది. జగిత్యాల జిల్లా గొల్లపల్లి మండలంలోని ఉల్లిగడ్డ లక్ష్మీపూర్ గ్రామంలో ఎన్నికల నేపథ్యంలో ఏర్పాటు చేసిన దావత్ వాతావరణం ఒక్కసారిగా ఉద్రిక్తతగామారింది. రాజకీయ చర్చలతో సాధారణంగా వచ్చే చిన్నపాటి వాగ్వాదాలు ఇక్కడ ఒక్క క్షణంలో తీవ్ర ఘర్షణకు దారి తీసి, అన్నదమ్ముల మధ్య దారుణ సంఘటన చోటుచేసుకుంది.
కళ్యాణ్, శ్రీనివాస్ పేర్లతో ఉన్న ఇద్దరు అన్నదమ్ములు ఒకే కుటుంబానికి చెందిన వారు. గ్రామంలో జరుగుతున్న పంచాయితీ ఎన్నికలపై మాట్లాడుకుంటూ ఉన్న సమయంలో వారి మధ్య మాటామాటా పెరిగి పెద్ద గొడవకు దారితీసింది. రాజకీయ అభిప్రాయ భేదాలు, కుటుంబంలో చాలాకాలంగా ఉన్న అంతర్గత విభేదాలు ఒక్కసారిగా చెలరేగినట్టుంది. ఆగ్రహంతో అడ్డుగోడలు దాటి మాట్లాడుకున్న కళ్యాణ్, చివరకు అదుపు కోల్పోయి, తన తమ్ముడు శ్రీనివాస్పై కత్తితో దాడి చేశాడు.
ఒక్కసారిగా జరిగిన దారుణంతో ఇంట్లో ఉన్నవారు అల్లాడిపోయారు. గొడవ చెలరేగిన వెంటనే పరిస్థితిని శాంతింపజేయడానికి మధ్యలోకి వచ్చిన తల్లి లతను కూడా కళ్యాణ్ అదే కత్తితో దాడి చేశాడు. తనదైన రీతిలో తమ ఇద్దరు పిల్లలను అడ్డుకునేందుకు ప్రయత్నించిన తల్లి తీవ్ర గాయాలతో కూలిపోయింది. గ్రామస్తులు ఆర్తనాదాలు విని అక్కడికి చేరుకునేలోపే ఇద్దరికీ గాయాలు తీవ్రంగా అయ్యాయి.
గ్రామస్థులు వెంటనే శ్రీనివాస్, లతలను జగిత్యాల ప్రభుత్వాస్పత్రికి తరలించారు. అయితే అక్కడి పరిస్థితి వారిని మరింత ఆందోళనకు గురి చేసింది. డ్యూటీ డాక్టర్లు, సర్జన్ లేరు అని చెప్పడంతో కుటుంబసభ్యులు, గ్రామస్థుల సహాయంతో వారిని వెంటనే ప్రైవేట్ ఆసుపత్రికి తరలించారు. ప్రస్తుతం ఇద్దరు చికిత్స పొందుతున్నట్టు సమాచారం.
ఘటన జరిగిన వెంటనే పోలీసులు గ్రామానికి చేరుకుని పరిస్థితిని పరిశీలించారు. రాజకీయ వివాదాలే ఈ ఘర్షణకు కారణమై ఉండవచ్చని ప్రాథమిక సమాచారం వచ్చింది. గ్రామంలో తీవ్ర ఉద్రిక్తత నెలకొనగా, పోలీసులు అదనపు బందోబస్తు ఏర్పాటు చేశారు. ఇలా పంచాయితీ ఎన్నికలు చిన్న గ్రామాల్లోనే కాకుండా కుటుంబాల్లో కూడా విభేదాలు పెంచుతున్నాయని స్థానికులు ఆందోళన వ్యక్తం చేస్తున్నారు.
ALSO READ: Singer Chinmayi: ‘డబ్బులు తీసుకుని ‘ల** ముం*’ అంటూ’.. కంప్లైంట్
