అమరావతి చట్టబద్ధత బిల్లుకు పార్లమెంట్ ఆమోదం లభించడం రాష్ట్ర రాజకీయాల్లో కీలక మలుపుగా మారింది. ఈ నేపథ్యంలో ఆంధ్రప్రదేశ్ ముఖ్యమంత్రి నారా చంద్రబాబు నాయుడు శుక్రవారం మీడియాతో మాట్లాడుతూ తన ఆనందాన్ని వ్యక్తం చేశారు. ఈ నిర్ణయం ప్రజల సంకల్పానికి నిదర్శనమని, ప్రజా రాజధాని అమరావతికి దక్కిన గౌరవంగా అభివర్ణించారు. ఈ బిల్లుకు మద్దతుగా నిలిచిన ప్రధాని నరేంద్రమోదీ, కేంద్ర హోంమంత్రి అమిత్ షా, లోక్సభ స్పీకర్, రాజ్యసభ ఛైర్మన్లకు ప్రత్యేకంగా ధన్యవాదాలు తెలిపారు. వైసీపీ మినహా మిగిలిన అన్ని రాజకీయ పార్టీలు ఈ బిల్లుకు మద్దతు ఇవ్వడం ప్రజాస్వామ్య విజయమని ఆయన పేర్కొన్నారు. దేశవ్యాప్తంగా అన్ని పార్టీలూ ఒకే దారిలో నడుస్తుంటే, వైసీపీ మాత్రం భిన్నంగా వ్యవహరించిందని తీవ్రంగా విమర్శించారు. రాష్ట్ర ప్రజల విశ్వాసాన్ని పొందిన తర్వాత కూడా వారి ఆకాంక్షలను ద్రోహం చేసిన పార్టీగా వైసీపీని ఆయన అభివర్ణించారు.
గత ప్రభుత్వ కాలంలో అభివృద్ధి కంటే రాజకీయ మొండితనానికి ప్రాధాన్యం ఇచ్చారని చంద్రబాబు విమర్శించారు. అమరావతిని రాజధానిగా అభివృద్ధి చేయకుండా అడ్డుకోవడమే ప్రధాన లక్ష్యంగా పని చేశారని ఆరోపించారు. అయితే తమ ప్రభుత్వం అధికారంలోకి వచ్చిన తర్వాత అమరావతిని తిరిగి రాజధానిగా నిలబెట్టి చట్టబద్ధత కల్పించామని తెలిపారు. రాష్ట్రానికి ఒక స్థిరమైన రాజధాని ఉంటేనే భవిష్యత్తు సుస్థిరంగా ఉంటుందని భావించి, భౌగోళికంగా మధ్యలో ఉన్న ప్రాంతాన్ని ఎంపిక చేసి అభివృద్ధి దిశగా ముందుకెళ్లామని వివరించారు. అభివృద్ధి వికేంద్రీకరణ తమ పార్టీ సిద్ధాంతమని స్పష్టం చేస్తూ, అమరావతితో పాటు తిరుపతి, విశాఖపట్నం ప్రాంతాలను కూడా సమానంగా అభివృద్ధి చేస్తామని హామీ ఇచ్చారు.
రాష్ట్ర విభజన సమయంలో రాజధాని లేక పరిపాలనలో ఎదురైన క్లిష్ట పరిస్థితులను కూడా ఈ సందర్భంగా ఆయన గుర్తుచేశారు. ఒక ప్రభుత్వ అధికారి కార్యాలయంలోనే పరిపాలన ప్రారంభించాల్సి వచ్చిన సందర్భాలను వివరించారు. ఎన్నికల్లో తీవ్రంగా ఓడిపోయి కేవలం 11 సీట్లకే పరిమితమైనప్పటికీ వైసీపీ తన వైఖరిని మార్చుకోలేదని అసహనం వ్యక్తం చేశారు. రాజధాని నిర్ణయాధికారం పార్లమెంట్కు లేదని చెప్పే వారి వ్యాఖ్యలను తీవ్రంగా ఖండించారు. ఇలాంటి వ్యాఖ్యలకు సమాధానం ఇవ్వడం కూడా కష్టంగా మారిందని పేర్కొన్నారు.
గతంలో సైబరాబాద్ అభివృద్ధిపై విమర్శలు వచ్చినప్పటికీ, నేడు అదే ప్రాంతం హైదరాబాద్ అభివృద్ధిలో కీలకంగా మారిందని ఆయన ఉదాహరణగా చెప్పారు. రాష్ట్ర అభివృద్ధిని అడ్డుకునే ప్రయత్నాలు జరుగుతున్నాయని, పెట్టుబడులు రాకుండా చేయడానికి భయపెట్టే విధంగా ప్రచారం జరుగుతోందని విమర్శించారు. అంతర్జాతీయ స్థాయిలో పేరుగాంచిన ప్రాంతాలపై అవినీతి ఆరోపణలు చేయడం దురదృష్టకరమని అన్నారు.
తెలంగాణ రాష్ట్రంపై తన అభిప్రాయాన్ని స్పష్టంచేస్తూ, రాష్ట్ర విభజన జరిగినప్పటికీ తెలంగాణకు తాను ఎప్పుడూ వ్యతిరేకం కాదని చంద్రబాబు నాయుడు పేర్కొన్నారు. సమైఖ్యాంధ్రప్రదేశ్లో 9 సంవత్సరాల పాటు ముఖ్యమంత్రిగా పనిచేసిన అనుభవంతోనే పోలవరం ప్రాజెక్టు కోసం 9 మండలాలను విలీనం చేయించానన్నారు. ఆ సమయంలో ఆ నిర్ణయం తీసుకోకపోతే ప్రమాణ స్వీకారం చేయనని కూడా చెప్పానని గుర్తుచేశారు. తెలుగు రాష్ట్రాల అభివృద్ధి కోసం హైదరాబాద్ను అభివృద్ధి చేశామని, తెలంగాణ ప్రజల గౌరవాన్ని ఎప్పటికీ కాపాడుతానని ఆయన స్పష్టం చేశారు.
ALSO READ: తాళి కట్టే వేళ వధువు ట్విస్ట్!.. ఏంటంటే?