– అటవీ భూముల లెక్కల్లో తేడా.. ప్రభుత్వాన్ని నిలదీసిన బీజేపి
– భూముల లెక్కల్లో భారీ తేడా ఉందన్న ఏలేటి మహేశ్వర్ రెడ్డి
– ప్రభుత్వ, అసైన్డ్ భూములు కబ్జా అవుతున్నాయని ఆరోపణలు
– ధరణి, భూభారతి పేర్లు మారినా అక్రమాలు ఆగలేదని విమర్శ
– భూముల వ్యవహారంపై సీబీఐ విచారణకు బీజేపీ డిమాండ్
క్రైమ్ మిర్రర్,హైదరాబాద్ :-
రాష్ట్రంలో అటవీ భూముల విస్తీర్ణంపై వెలువడుతున్న గణాంకాలు ఇప్పుడు రాజకీయంగా చర్చనీయాంశమయ్యాయి. అధికారిక రికార్డుల్లో ఉన్న విస్తీర్ణానికి, ప్రభుత్వం చెబుతున్న లెక్కలకు మధ్య భారీ తేడా ఉందంటూ బీజేపీ శాసనసభాపక్ష నేత ఏలేటి మహేశ్వర్ రెడ్డి ప్రశ్నించారు. లక్షలాది ఎకరాల భూముల వివరాలపై స్పష్టత ఇవ్వాలని రాష్ట్ర ప్రభుత్వాన్ని డిమాండ్ చేశారు.
లెక్కల్లో ఇంత తేడా ఎందుకు?
హైదరాబాద్‌లోని బీజేపీ రాష్ట్ర కార్యాలయంలో నిర్వహించిన మీడియా సమావేశంలో మహేశ్వర్ రెడ్డి పవర్‌పాయింట్ ప్రజెంటేషన్ ద్వారా భూములకు సంబంధించిన గణాంకాలను ప్రస్తావించారు. రాష్ట్రంలో 66,33,313 ఎకరాల అటవీ భూమి ఉండాల్సి ఉందని అధికారిక రికార్డులను ఉటంకించారు. అయితే, మంత్రి పొంగులేటి శ్రీనివాస్ రెడ్డి వెల్లడించిన వివరాల్లో అటవీ భూమి విస్తీర్ణం 42.53 లక్షల ఎకరాలుగానే ఉందని పేర్కొన్నారు. ఈ రెండు లెక్కల మధ్య వ్యత్యాసంపై ప్రభుత్వం సమాధానం చెప్పాలని కోరారు.
ప్రభుత్వ భూములకు రక్షణ లేదా?
రాష్ట్రంలో ప్రభుత్వ భూములు, అసైన్డ్ భూములు పెద్దఎత్తున ఇతరుల చేతుల్లోకి వెళ్తున్నాయని మహేశ్వర్ రెడ్డి ఆరోపించారు. ప్రముఖ రాజకీయ నాయకుల ప్రమేయంతో భూకబ్జాలు జరుగుతున్నాయని విమర్శించారు. అసైన్డ్ భూములను విక్రయించేందుకు ప్రభుత్వం ప్రయత్నిస్తోందని, దీనివల్ల పేదలకు అన్యాయం జరుగుతుందని అభ్యంతరం వ్యక్తం చేశారు.
పోర్టల్ మారింది.. సమస్య పరిష్కారమైందా?
భూముల రికార్డుల నిర్వహణ కోసం గతంలో అమలులో ఉన్న ధరణి స్థానంలో భూభారతి వచ్చినప్పటికీ, భూ అక్రమాల పరిస్థితిలో మార్పు కనిపించడం లేదని బీజేపీ నేత విమర్శించారు. గతంలో న్యాయస్థానం రాజ్యాంగ విరుద్ధమని పేర్కొన్న సెక్షన్ 22ఏను కొన్ని మార్పులతో కొనసాగించడంపైనా ఆయన అభ్యంతరం తెలిపారు.
పాత భూ అక్రమాలపై విచారణ ఎప్పుడు?
గత బీఆర్ఎస్ ప్రభుత్వ హయాంలో జరిగినట్లు ఆరోపిస్తున్న అవినీతిపై సీబీఐ విచారణ జరిపించేందుకు ప్రస్తుత కాంగ్రెస్ ప్రభుత్వం ఎందుకు ముందుకు రావడం లేదని మహేశ్వర్ రెడ్డి ప్రశ్నించారు. అటవీ భూముల లెక్కల్లో తేడాలు, ప్రభుత్వ భూముల పరిరక్షణ, అసైన్డ్ భూముల వ్యవహారాలపై ప్రభుత్వం స్పష్టమైన సమాధానం ఇవ్వాలని డిమాండ్ చేశారు.
….