హైదరాబాద్, క్రైమ్ మిర్రర్: వేసవి కాలం వచ్చిందంటే దాహం, అలసట, నీరసం చాలామందిని ఇబ్బంది పెడుతుంటాయి. అలాంటి సమయంలో బయట దొరికే కూల్డ్రింక్స్ కంటే ఇంట్లోనే తయారు చేసుకునే హెల్తీ డ్రింక్స్ శరీరానికి ఎంతో మేలు చేస్తాయి. వాటిలో ABC జ్యూస్ ఇప్పుడు చాలామందికి ఫేవరెట్గా మారింది.
యాపిల్, బీట్రూట్, క్యారెట్ కలయికతో తయారయ్యే ఈ జ్యూస్ శరీరానికి అవసరమైన పోషకాలను అందించడమే కాదు, వేసవి వేడిలో ఫ్రెష్గా ఉండేందుకు కూడా బాగా సహాయపడుతుంది. అయితే ఇదే ABC జ్యూస్ను మరింత రుచిగా, కూల్గా కొత్త స్టైల్లో తయారు చేస్తే పిల్లల నుంచి పెద్దల వరకు అందరూ ఇష్టంగా తాగేస్తారు.
ఈ జ్యూస్ తయారికి ఒక యాపిల్, అర బీట్రూట్, ఒక క్యారెట్, చిన్న అల్లం ముక్క, ఐదు నుంచి ఆరు పుదీనా ఆకులు, ఒక స్పూన్ నిమ్మరసం, ఒకటి లేదా రెండు స్పూన్ల తేనె, చల్లని నీరు లేదా ఐస్ క్యూబ్స్ తీసుకోవాలి. ముందుగా యాపిల్, క్యారెట్, బీట్రూట్ను శుభ్రంగా కడిగి చిన్న ముక్కలుగా తరిగి పెట్టుకోవాలి. తర్వాత మిక్సీ జార్లో ఈ ముక్కలతో పాటు అల్లం, పుదీనా వేసి కొద్దిగా చల్లని నీరు పోసి మెత్తగా బ్లెండ్ చేసుకోవాలి.
మీకు పల్ప్తో తాగడం ఇష్టం లేకపోతే వడకట్టుకోవచ్చు. ఫైబర్ కావాలంటే అలాగే తీసుకోవచ్చు. తర్వాత అందులో నిమ్మరసం, తేనె వేసి బాగా కలపాలి. చివరగా గ్లాస్లోకి పోసి ఐస్ క్యూబ్స్, పుదీనా ఆకులతో గార్నిష్ చేస్తే చల్లచల్లగా తాగేందుకు ABC జ్యూస్ రెడీ అవుతుంది.
ఈ జ్యూస్ను రెగ్యులర్గా తీసుకుంటే శరీరానికి మంచి ఎనర్జీ అందుతుంది. బీట్రూట్ రక్త శుద్ధికి సహాయపడుతుంది. క్యారెట్లో ఉండే విటమిన్ ఏ కళ్ల ఆరోగ్యానికి మేలు చేస్తుంది. యాపిల్ శరీరానికి అవసరమైన పోషకాలు అందిస్తుంది. అలాగే చర్మం కూడా సహజమైన కాంతితో మెరుస్తుంది. వేసవిలో కూల్గా ఉండాలంటే ఈ ABC జ్యూస్ను ఒకసారి ట్రై చేయండి.
