మధ్యప్రాచ్యంలో కొనసాగుతున్న ఘర్షణలు ప్రపంచ సైనిక సమీకరణాలను గణనీయంగా ప్రభావితం చేస్తున్నాయి. ముఖ్యంగా అమెరికా మరియు ఇరాన్ మధ్య పెరుగుతున్న ఉద్రిక్తతలు కేవలం భద్రతా కోణంలోనే కాకుండా ఆర్థిక రంగానికీ భారీ దెబ్బతీస్తున్నాయి. ప్రముఖ అంతర్జాతీయ పత్రిక ది వాల్ స్ట్రీట్ జర్నల్ వెల్లడించిన నివేదిక ప్రకారం కేవలం 21 రోజుల్లోనే అమెరికా సైనిక ఆస్తులకు సుమారు రూ.1.4 బిలియన్ నుంచి రూ.2.9 బిలియన్ డాలర్ల వరకు నష్టం సంభవించినట్లు అంచనా వేయబడింది. ఈ నష్టాల పరిమాణం చూస్తే, ఘర్షణ ఎంత తీవ్రమైందో స్పష్టంగా అర్థమవుతోంది. యుద్ధ పరిస్థితులు మరింత తీవ్రమవుతున్న కొద్దీ ఈ నష్టం ఇంకా పెరిగే అవకాశముందని నిపుణులు హెచ్చరిస్తున్నారు. సైనిక వ్యూహాలు, ఆయుధ వినియోగం, రక్షణ చర్యలు అన్నీ ఒకేసారి పరీక్షించబడుతున్న ఈ పరిస్థితుల్లో ప్రపంచ దేశాలు కూడా అప్రమత్తంగా వ్యవహరిస్తున్నాయి.
ఈ ఘర్షణలో అత్యాధునిక యుద్ధ విమానాల నష్టం అమెరికాకు పెద్ద దెబ్బగా మారింది. ముఖ్యంగా కువైట్ మిత్రదేశానికి చెందిన విమానం పొరపాటున అమెరికాకు చెందిన F-15E జెట్లను కూల్చివేయడం ఈ సంఘటనలో కీలకంగా మారింది. అంతేకాకుండా అత్యాధునిక F-35A లైట్నింగ్ II కూడా అత్యవసర ల్యాండింగ్ చేయాల్సి రావడం పరిస్థితి ఎంత క్లిష్టంగా మారిందో తెలియజేస్తోంది. ఇంధన సరఫరా వ్యవస్థలపైనా తీవ్ర ప్రభావం పడింది. KC-135 స్ట్రాటోట్యాంకర్లపై జరిగిన దాడుల్లో సైనికులు ప్రాణాలు కోల్పోవడం పరిస్థితిని మరింత విషమం చేసింది. అదనంగా MQ-9 రీపర్ డ్రోన్లు కూడా భారీగా ధ్వంసమయ్యాయి. ఒక్కో డ్రోన్ విలువ మిలియన్ల డాలర్లలో ఉండటంతో ఆర్థిక నష్టం మరింత పెరిగింది. ఈ పరిణామాలు యుద్ధ వ్యూహాల్లో మార్పులకు దారితీసే అవకాశముంది.
రాడార్ వ్యవస్థలు కూడా ఈ దాడుల ప్రభావం నుంచి తప్పించుకోలేకపోయాయి. జోర్డాన్ మరియు ఖతార్ ప్రాంతాల్లో ఉన్న కీలక రక్షణ, నిఘా వ్యవస్థలు దెబ్బతినడంతో అమెరికా పర్యవేక్షణ సామర్థ్యంపై ప్రతికూల ప్రభావం పడింది. సముద్ర మార్గాల్లో కూడా సమస్యలు తలెత్తాయి. యూఎస్ నేవీకి చెందిన యూఎస్ఎస్ గెరాల్డ్ ఆర్. ఫోర్డ్ అనే విమాన వాహక నౌకలో అగ్నిప్రమాదం సంభవించడం పరిస్థితిని మరింత క్లిష్టం చేసింది. ఈ పరిణామాల నేపథ్యంలో పెంటాగన్ అదనంగా రూ.200 బిలియన్ డాలర్ల నిధులను కోరుతున్నట్లు సమాచారం. పూర్తి స్థాయి భూయుద్ధం ప్రారంభం కాకముందే ఈ స్థాయిలో నష్టం సంభవించడం ప్రపంచ భద్రతపై తీవ్రమైన ఆందోళనలను రేకెత్తిస్తోంది. అంతర్జాతీయ వాతావరణం మరింత ఉద్రిక్తంగా మారే అవకాశముందని విశ్లేషకులు భావిస్తున్నారు.
ALSO READ: చెట్టుపై కనిపించిన అనుమానాస్పద కవర్.. ఏముందా అని చూడగా..