నగర జీవనశైలిలో పెరుగుతున్న ట్రాఫిక్ రద్దీ, పనిభారం, నిరంతర ఒత్తిడి కారణంగా చాలా మంది మానసికంగా, శారీరకంగా అలసటకు గురవుతున్నారు. రోజువారీ పరుగుల మధ్య కొద్దిసేపైనా ప్రశాంతత కోసం వెతకడం సహజంగా మారింది. అలాంటి సమయంలో ప్రకృతి ఒడిలో ఒకటి లేదా 2 రోజులు గడపాలని చాలా మందికి అనిపిస్తుంది. నగర శబ్దాల నుంచి దూరంగా వెళ్లి స్వచ్ఛమైన గాలి పీలుస్తూ, పచ్చని ప్రకృతి మధ్య విశ్రాంతి తీసుకోవడం ద్వారా మనసుకు కొత్త ఉత్సాహం వస్తుంది. దక్షిణ భారతదేశంలో అలాంటి ప్రశాంతతను అందించే ఎన్నో అద్భుతమైన ప్రదేశాలు ఉన్నాయి. చిన్న విరామం తీసుకుని ప్రకృతిని ఆస్వాదించాలని భావించే వారికి ఇవి ఉత్తమ ఎంపికలుగా నిలుస్తాయి.
తమిళనాడులోని ఊటీ సమీపంలో ఉన్న కూనూర్ పర్యాటకులను ఆకట్టుకునే అందమైన ప్రదేశంగా ప్రసిద్ధి చెందింది. సముద్ర మట్టానికి సుమారు 1850 మీటర్ల ఎత్తులో ఉన్న ఈ ప్రాంతం ఎప్పుడూ చల్లని వాతావరణంతో ఆకర్షిస్తుంది. నగర గోల నుంచి దూరంగా ఉండే ఈ ప్రాంతంలో ఎక్కడ చూసినా విస్తరించి ఉన్న పచ్చని తేయాకు తోటలు కనిపిస్తాయి. ఆ తోటల మధ్య నడుస్తూ గడిపే ప్రతి క్షణం మనసుకు ప్రశాంతతను అందిస్తుంది. మబ్బులతో కప్పుకున్న కొండలు, నిశ్శబ్ద వాతావరణం ఈ ప్రాంతాన్ని మరింత ప్రత్యేకంగా మారుస్తాయి.
కర్ణాటకలోని ఉత్తర కన్నడ జిల్లాలో ఉన్న గోకర్ణ మరో అద్భుతమైన గమ్యస్థానంగా నిలుస్తుంది. ఆధ్యాత్మికతతో పాటు ప్రకృతి అందాలు కలిసిన ఈ ప్రదేశం విశ్రాంతి కోరుకునే వారికి ఎంతో అనుకూలంగా ఉంటుంది. ఒకవైపు పురాతన ఆలయాలు, మరోవైపు అరేబియా సముద్ర తీరాలు ఈ ప్రాంతానికి ప్రత్యేక ఆకర్షణగా నిలుస్తాయి. అలల శబ్దం మధ్య సముద్రాన్ని తిలకిస్తూ గడిపే సమయం మనసుకు అపూర్వమైన ప్రశాంతతను ఇస్తుంది. మహాబలేశ్వర ఆలయం, ఓం బీచ్, కుడ్లే బీచ్ వంటి ప్రదేశాలు సందర్శకులను ఎంతో ఆకట్టుకుంటాయి.
పశ్చిమ కనుమల మధ్యలో ఉన్న చిక్మగళూరు ప్రకృతి ప్రేమికులకు నిజమైన స్వర్గధామంగా చెప్పవచ్చు. ఎత్తైన ప్రాంతంలో ఉండటంతో ఇక్కడి వాతావరణం ఎప్పుడూ చల్లగా, ఆహ్లాదకరంగా ఉంటుంది. విస్తరించిన కాఫీ తోటలు, పచ్చని కొండలు ఈ ప్రాంతానికి ప్రత్యేక అందాన్ని తీసుకువస్తాయి. నిశ్శబ్దంగా ప్రకృతి మధ్య నడుస్తూ గడిపే క్షణాలు మనసుకు కొత్త శక్తిని అందిస్తాయి. ప్రకృతి ఒడిలో గడిపే ఈ అనుభవం జీవితాన్ని కొత్తగా అనిపించేలా చేస్తుంది.
ఈ ప్రదేశాలు నగర జీవితపు అలసటను తగ్గించి, మనసుకు నూతన ఉత్సాహాన్ని అందించే ప్రకృతి వరాలు. కొద్దిసేపైనా ప్రకృతి మధ్య గడపడం ద్వారా మనసు ప్రశాంతంగా మారి, తిరిగి రోజువారీ జీవితాన్ని మరింత ఉత్సాహంగా కొనసాగించడానికి శక్తి లభిస్తుంది.
ALSO READ: గరుడ పురాణం ప్రకారం గత జన్మలో మీ భార్య ఎవరో తెలుసా..?