ఐదేళ్ల చిన్నారి… అభం శుభం తెలియని పసిపాప. ఆ చిన్నారిపై అఘాయిత్యం చేశాడో యువకుడు. అత్యంత దారుణంగా… పైశాచికంగా… చిన్నారిని చిదిమేశాడు. ఆమె ప్రైవేట్‌ భాగాలపై 28 కుట్లు పడ్డాయంటే.. ఆ మానవమృగం… ఎంత పాశవికంగా ప్రవర్తించాడో అర్థమవుతోంది. ఐదేళ్ల పాప… ఎంత అల్లాడిపోయిందో ఊహకు అందదు. ఆమె ఒళ్లంతా గాయాలు ఉన్నాయని వైద్యులు చెప్తున్నారు. ప్రస్తుతం బాధిత చిన్నారి పరిస్థితి విషమంగా ఉంది. ఐసీయూలో చికిత్స పొందుతోంది. ప్రాణాలతో పోరాడుతోంది.
మధ్యప్రదేశ్‌ శివపురిలో ఈ దారుణం జరిగింది. పొరుగింట్లో ఉన్న చిన్నారిపై కన్నేశాడు 17ఏళ్ల యువకుడు. బాలిక.. అమ్మమ్మ, తాతయ్య… ఆస్పత్రిలో చికిత్స పొందుతున్న బాలిక తండ్రిని చూసేందుకు వెళ్లారు. ఇంట్లో బాలిక తల్లి, చిన్న కుమారుడు ఉన్నారు. బాలిక ఇంటి బయట ఆడుకుంటోంది. ఆ సమయంలో.. చిన్నారిని ఎత్తుకెళ్లాడు కామాంధుడు. పాపను పాడుబడిన ఇంట్లోకి తీసుకెళ్లి.. అత్యంత దారుణంగా అత్యాచారం చేశాడు. ఆమె ప్రైవేట్‌ భాగాలు, ముఖం, దవడలపై తీవ్రగాయాలు ఉన్నాయి. అంతేకాదు… చిన్నారి శరీరాన్ని రెండు భాగాలుగా చీల్చేందుకు కూడా ప్రయత్నించాడా మానవమృగం. పాప తలను నేలకేసి కొట్టి చంపేందుకు కూడా ప్రయత్నించాడు. ప్రస్తుతం పోలీసుల అదుపులో ఉన్నాడు నిందితుడు. నిందితుడి ఇంటిపై దాడి చేశారు బాధిత కుటుంబీకులు. అతని ఇంటిని కూల్చివేశారు. నిందితుడిని బహిరంగంగా ఉరితీయాలని డిమాండ్‌ చేస్తున్నారు.
ప్రస్తుతం… గ్వాలియర్‌లోని కమలా రాజా ఆస్పత్రిలో చికిత్స పొందుతోంది బాధిత చిన్నారి. ఐసీయూలో చావుబతుల మధ్య కొట్టుమిట్టాడుతోంది. శరీరమంతా గాయాలు కావడంతో.. విపరీతమైన నొప్పితో బాధపడుతోందని వైద్యులు తెలిపారు. పాపకు ఇప్పటి వరకు 28 కుట్లు పడ్డాయని… ఆమెను కాపాడేందుకు తమ వంతు ప్రయత్నం చేస్తున్నామని చెప్తున్నారు.
భోపాల్‌లో చిన్నారి అత్యాచారం:- మధ్యప్రదేశ్‌ రాజధాని భోపాల్‌లోనూ ఇలాంటి దారుణమే జరిగింది. ఐదేళ్ల చిన్నారిపై 60ఏళ్ల వృద్ధుడు అత్యాచారం చేశాడు. పొరుగింట్లో ఒంటరిగా ఉన్న చిన్నారిపై లైంగిక దాడి చేసి పారిపోయాడు. ఇంటికి వచ్చిన బాలిక తల్లిదండ్రులు… పాపకు ఆరోగ్యం సరిగా లేదని గమనించి ఆస్పత్రికి తీసుకెళ్లగా… జరిగిన దారుణం బయటపడింది. బాధిత కుటుంబం ఇచ్చిన ఫిర్యాదుతో పోలీసులు నిందితుడు షంషాద్‌ను అరెస్ట్‌ చేసి జైలుకు పంపారు.
