Sports: భారత బ్యాక్సింగ్ రంగంలో తన ప్రత్యేక ముద్ర వేసుకున్న నిఖత్ జరీన్ మరోసారి తన ప్రతిభను ప్రపంచానికి చాటుకుంది. రెండుసార్లు ప్రపంచ ఛాంపియన్‌గా నిలిచి దేశానికి గర్వకారణమైన ఈ స్టార్ బాక్సర్ దాదాపు ఇరవై నెలల విరామం తర్వాత మళ్లీ అంతర్జాతీయ వేదికపై పసిడి పతకాన్ని సొంతం చేసుకోవడం ఆమె కృషి, పోరాటస్ఫూర్తికి నిదర్శనం.
గ్రేటర్ నోయిడాలో జరిగిన వరల్డ్ బాక్సింగ్ వరల్డ్ కప్‌లో అద్భుత ప్రదర్శనతో స్వర్ణం గెలిచిన నిఖత్.. తన పునరాగమనమే కాదు, భారత మహిళా బాక్సర్ల సామర్థ్యాన్నీ మరోసారి రుజువు చేసింది. ఈ టోర్నమెంట్లో భారత్ సాధించిన 20 పతకాలలో 10 పతకాలు మహిళలే గెలవడం, అందులో ఏడు స్వర్ణాలు ఉండటం, భారత క్రీడల వైపు మహిళల ఆత్మవిశ్వాసం, శ్రమ ఏ స్థాయికి చేరిందో స్పష్టంగా చూపుతోంది.
Indian boxing star Nikhat Zareen (@nikhat_zareen) has clinched a World Cup medal in the 51kg category, marking another golden milestone after her Asian Games victory. Speaking to NDTV's @cheerica, Nikhat celebrated the win with her trademark candor — from dreaming of going home… pic.twitter.com/ykvNUrpz8o
— NDTV (@ndtv) November 20, 2025
పతకం గెలిచిన వెంటనే ఎన్డీటీవీతో మాట్లాడుతూ నిఖత్ ఎంతో భావోద్వేగానికి లోనైంది. ఈ విజయం తన మనసును ఎంతగా తాకిందో మాటల్లో చెప్పలేనని, ముఖ్యంగా స్వదేశంలో ప్రేక్షకుల ముందు స్వర్ణం గెలవడం ఎంతో ప్రత్యేకమైందని ఆమె చెప్పింది. క్రీడాకారిణిగా దేశం గర్వపడేలా ఉండటం తన ప్రధాన లక్ష్యమని, భవిష్యత్తులో మరింత కష్టపడి ఆడతానని ఆమె హామీ ఇచ్చింది. ట్రైనింగ్‌లో ఎంత కఠిన క్రమశిక్షణ పాటించినా, తన ఇష్టమైన బిర్యానీని మాత్రం పూర్తిగా మానలేనని నవ్వుతూ చెప్పిన నిఖత్, ఇంటికి చేరగానే మొదటి పని బిర్యానీ తినడమే అని సరదాగా వెల్లడించింది.
ప్రస్తుతం కొన్ని రోజులు విరామం తీసుకున్నా, వెంటనే మళ్లీ శిక్షణ క్యాంపుకు తిరిగి వెళ్తానని ఆమె పేర్కొంది. రాబోయే నేషనల్ ఛాంపియన్‌షిప్‌తో పాటు మార్చిలో జరగనున్న ఆసియన్ ఛాంపియన్‌షిప్స్‌పైనా దృష్టి పెట్టాలని భావిస్తోంది. ఆ టోర్నమెంట్లో పతకం సాధిస్తే ప్రపంచ ర్యాంకింగ్స్‌లో మంచి పాయింట్లు లభించి ఆసియా గేమ్స్, కామన్వెల్త్ గేమ్స్‌ల్లో సీడింగ్‌కు ఉపయోగపడతాయని నిఖత్ వివరించింది.
భారత మహిళా క్రీడల ఎదుగుదల గురించి మాట్లాడుతూ.. నిఖత్ ఎంతో ఆశాజనకంగా స్పందించింది. మహిళా అథ్లెట్లకు ఇప్పుడు లభిస్తున్న ఆదరణ, ప్రోత్సాహం గతంలో లభించి ఉండి ఉంటే భారత్ మరిన్ని ఒలింపిక్ స్థాయి గెలుపులను సాధించేదని ఆమె అభిప్రాయపడింది. తన అభిమాన నటుడు సల్మాన్ ఖాన్‌ను కలిసిన అనుభవం తన జీవితంలో మరచిపోలేని జ్ఞాపకమని, మరోసారి ఆయన్ను కలవాలని కోరుకుంటున్నానని వెల్లడించింది.
ALSO READ: Viral News: దెబ్బతగిలిందని హాస్పిటల్ కు వెళ్తే.. డాక్టర్ చేసిన పనికి అంతా షాక్!
