Risk: చలికాలంలో బయట ఉష్ణోగ్రతలు పెద్దగా పడిపోయినప్పటికీ చాలా మంది ఇంట్లో అలవాటుగా ఫ్యాన్ ఆన్చేసుకుని నిద్రపోతుంటారు. రాత్రిపూట ఫ్యాన్ గాలి నేరుగా శరీరాన్ని తాకడం ఎంతో సౌకర్యంగా అనిపించినా.. అది లోపల నుంచి శరీరంపై అనేక రకాల మార్పులు కలిగిస్తుంది. నిపుణుల అభిప్రాయం ప్రకారం.. చల్లని గాలి శరీర ఉష్ణోగ్రతను ఒక్కసారిగా తగ్గించే శక్తి కలిగి ఉంటుంది. ఇటువంటి వేగవంతమైన ఉష్ణోగ్రత మార్పులు శరీరంలోని రోగనిరోధక వ్యవస్థపై అనుకోని ఒత్తిడిని తెస్తాయి.
ఫ్యాన్ గాలి నేరుగా తగిలినప్పుడు గొంతు భాగం త్వరగా ఎండిపోవడం లేదా చల్లబడడం జరుగుతుంది. ఇది ఉదయం నిద్ర లేవగానే గొంతు నొప్పి, గొంతులో రాపిడి, దగ్గు వంటి సమస్యలకు దారితీస్తుంది. ఎక్కువసేపు చల్లగాలి తగిలినప్పుడు శ్వాసనాళాలు సంకోచం చెంది శ్వాస తీసుకోవడంలో ఇబ్బందులు ఏర్పడే అవకాశం కూడా ఉంది. ముఖ్యంగా చిన్నపిల్లలు, వృద్ధులు, సైనస్ సమస్యలు ఉన్నవారు, దమ్ముతో బాధపడేవారు ఇలాంటి పరిస్థితుల్లో మరింత అస్వస్థతను ఎదుర్కొంటారు.
చలికాలంలో ఫ్యాన్ గాలి కండరాలపై కూడా ప్రభావం చూపిస్తుంది. నిద్రలో ఉండగా శరీరం చల్లబడడం వలన తెల్లవారుజామున మేల్కొన్న వెంటనే చేతులు, కాళ్లలో బలహీనత, నొప్పి వంటి లక్షణాలు కనిపించవచ్చు. వైద్య నిపుణులు చెబుతున్న ప్రకారం.. రాత్రిపూట శరీరం సాధారణమైన వేడిని నిలుపుకోవాలని ప్రయత్నిస్తుంటుంది. కానీ ఫ్యాన్ నుంచి వచ్చే చల్లని గాలి ఆ ప్రక్రియను డిస్టర్బ్ చేసి నిద్ర నాణ్యతను దెబ్బతీస్తుంది.
నిద్రలో తరచూ లేచిపోవడం, పూర్తిగా విశ్రాంతి పొందకపోవడం రోగనిరోధక శక్తిని తగ్గించడానికి దారితీస్తుంది. చలి తగిలినప్పుడు శరీరం వేడిని నిలుపుకోవడానికి అదనంగా శ్రమించాల్సి వస్తుంది. ఈ ప్రక్రియలో శరీరంలోని శక్తి వినియోగం పెరుగుతుంది. రోజంతా అలసట, ఉదయం నిద్రలేవగానే శరీరం బరువుగా అనిపించడం కూడా ఇలాంటి అలవాట్ల వల్లే జరుగుతుందని నిపుణులు సూచిస్తున్నారు.
ముఖ్యంగా చలికాలంలో ఫ్యాన్ పూర్తిగా అవసరం లేకపోతే ఆఫ్చేయడం, గది గాలివెంటిలేషన్ను మాత్రమే ఉపయోగించడం, శరీరానికి వేడి ఇచ్చే దుప్పట్లు వాడడం వంటి జాగ్రత్తలు తీసుకోవడం మంచిదని వైద్యులు సిఫార్సు చేస్తున్నారు. ఫ్యాన్ తప్పకుండా వాడాల్సిన పరిస్థితిలోనూ గాలి నేరుగా శరీరాన్ని తాకకుండా దిశ మార్చి ఉంచడం మంచిదని చెబుతున్నారు. చిన్నచిన్న మార్పులతో శరీరాన్ని చలికి దూరంగా ఉంచుకోవడం, ఆరోగ్యాన్ని కాపాడుకోవడం సాధ్యమని నిపుణుల అభిప్రాయం.
ALSO READ: Violent: బస్సు డ్రైవర్, కండక్టర్ల గొంతు కోశారు..