Politics: ఢిల్లీలో అధికారిక పర్యటనలో తెలంగాణ ముఖ్యమంత్రి రేవంత్రెడ్డి బిజీగా గడుపుతూ కేంద్ర ప్రభుత్వంతో సంబంధిత కీలక అంశాలపై వరుస సమావేశాలు నిర్వహిస్తున్నారు. రాష్ట్రానికి రావాల్సిన నిధులు, అభివృద్ధి ప్రాజెక్టుల పురోగతిపై చర్చించేందుకు ఆయన పలువురు కేంద్రమంత్రులను కలుస్తున్నారు. ఇదే సమయంలో ఆంధ్రప్రదేశ్కు చెందిన వైసీపీ నేత, మాజీ మంత్రి రోజా అనూహ్యంగా ఎదురుపడటంతో ఈ సంఘటన రాజకీయ వర్గాల్లో చర్చనీయాంశంగా మారింది. ఇద్దరూ ఒకరినొకరు చూసుకుని ఆప్యాయంగా పలకరించుకోవడంతో పాటు షేక్ హ్యాండ్ ఇచ్చుకున్నారు. ఈ సన్నివేశం వెంటనే రాజకీయ వర్గాల్లో ఆసక్తిని రేకెత్తించడంతో, రోజా ఢిల్లీ పర్యటనపై పలు ఊహాగానాలు మొదలయ్యాయి.
బుధవారం ఉదయం పార్లమెంటు భవనానికి వచ్చిన రోజా.. కేంద్ర రహదారి రవాణా శాఖ మంత్రి నితిన్ గడ్కరీని కలిసేందుకు వెళ్లారు. అదే సమయంలో అక్కడికి చేరుకున్న సీఎం రేవంత్రెడ్డి ఆమెను గమనించగా, రోజా ముందుకు వచ్చి పలకరించారు. ఇరువురి మధ్య స్వల్ప సంభాషణ జరిగింది. ఈ సందర్భంలో సీఎంను వెంట ఉన్న కొందరు నాయకులు రోజా పర్యటన గురించి ప్రశ్నించగా, తాను అధికారిక పనిమీద వచ్చానని ఆమె స్పష్టం చేశారు. అనంతరం రాజ్యసభ సభ్యుడు వేం నరేందర్రెడ్డిని కూడా రోజా కలసి మాట్లాడారు.
రోజా ఢిల్లీ పర్యటన వెనుక అసలు ఉద్దేశ్యం ఏమిటన్నదానిపై రాజకీయ పార్టీల్లో చర్చలు జోరందుకున్నాయి. ముఖ్యంగా తెలుగుదేశం పార్టీ వర్గాల్లో ఈ అంశంపై ఆరా మొదలైంది. హస్తినలో రోజా ఉన్నట్టు తెలిసిన వెంటనే ఆమె కార్యక్రమాలపై సమాచారం సేకరించే ప్రయత్నాలు జరుగుతున్నట్లు సమాచారం. ఆమె పర్యటనకు రాజకీయ ప్రాధాన్యం ఉందా అనే దానిపై అనుమానాలు వ్యక్తమవుతున్నాయి. అయితే వైసీపీ వర్గాలు మాత్రం ఈ పర్యటన పూర్తిగా ప్రజా ప్రయోజనాల కోసమేనని చెబుతున్నాయి.
రోజా ప్రాతినిధ్యం వహిస్తున్న నగరి నియోజకవర్గంలో సుమారు 600 ఏళ్ల చరిత్ర కలిగిన ఒక ఆలయం ఉందని, దాని పరిరక్షణ కోసం కేంద్ర ప్రభుత్వ సహాయం అవసరమని పేర్కొంటూ నితిన్ గడ్కరీని కలిసి విజ్ఞప్తి చేసినట్లు సమాచారం. అయితే చారిత్రక, పర్యాటక అంశాలకు సంబంధించిన విషయాలను పర్యాటక శాఖ పరిధిలోకి తీసుకుంటారని తెలుగుదేశం పార్టీ నాయకులు చెబుతున్నారు. అందుకే ఆ శాఖకు చెందిన కేంద్రమంత్రి గజేంద్రసింగ్ షెకావత్ లేదా సహాయమంత్రి సురేష్ గోపిని కలవాల్సిందని వారు అభిప్రాయపడుతున్నారు. ఈ నేపథ్యంలో గడ్కరీతో రోజా భేటీ వెనుక మరేదైనా కారణాలు ఉన్నాయా అనే చర్చలు కొనసాగుతున్నాయి. మొత్తం మీద ఢిల్లీలో జరిగిన ఈ అనూహ్య భేటీ రాజకీయంగా ఆసక్తిని పెంచుతూ వివిధ కోణాల్లో చర్చకు దారి తీసింది.
ALSO READ: ఇది పెళ్లిలా లేదు.. ఉట్టి కొట్టే పోటీలా ఉంది.. గాలిలో తేలుతూ వధూవరుల వరమాల (Viral Video)