ప్రముఖ నటి రకుల్ ప్రీత్ సింగ్ తనపై వస్తున్న వార్తలపై తీవ్ర అసంతృప్తి వ్యక్తం చేశారు. ఆమె భర్త జాకీ భగ్నానీ, మామ వాసు భగ్నానీకి సంబంధించిన నిర్మాణ సంస్థ కార్యాలయాల్లో ఆదాయపు పన్ను శాఖ అధికారులు సోదాలు నిర్వహించిన నేపథ్యంలో కొన్ని మీడియా కథనాలు తన పేరును ప్రస్తావించడంపై ఆమె స్పందించారు.
తాజాగా జరిగిన ఐటీ సోదాలకు తనకు ఎలాంటి సంబంధం లేదని రకుల్ స్పష్టం చేసినట్లు సమాచారం. తాను ఎలాంటి చట్టవిరుద్ధమైన ఆర్థిక లావాదేవీలకు పాల్పడలేదని, తనకు బినామీ ఆస్తులు కూడా లేవని ఆమె పేర్కొన్నారు.
తాను ఆర్మీ కుటుంబం నుంచి వచ్చానని చెప్పిన రకుల్.. చిన్న వయసు నుంచే ఆర్థిక విషయాల్లో ఎంతో జాగ్రత్తగా ఉంటున్నానని తెలిపారు. సుమారు 20 ఏళ్ల వయసు నుంచే క్రమం తప్పకుండా పన్నులు చెల్లిస్తున్నానని వెల్లడించారు.
తనకు సంబంధం లేని విషయాల్లో తన పేరును ప్రస్తావిస్తూ తప్పుడు కథనాలు ప్రచురించడం సరికాదని రకుల్ అభ్యంతరం వ్యక్తం చేశారు. వాస్తవాలను నిర్ధారించకుండా ప్రచురించిన కథనాలను సంబంధిత మీడియా సంస్థలు తొలగించాలని ఆమె కోరినట్లు తెలుస్తోంది.
జాకీ భగ్నానీ, వాసు భగ్నానీకి సంబంధించిన నిర్మాణ సంస్థపై జరిగిన ఐటీ సోదాల నేపథ్యంలో ఈ వ్యవహారం ప్రస్తుతం సినీ వర్గాల్లో చర్చనీయాంశంగా మారింది. అయితే ఈ తనిఖీలతో తనకు ఎలాంటి సంబంధం లేదని రకుల్ ఇచ్చిన వివరణతో తనపై వస్తున్న ప్రచారానికి ఆమె తెరదించే ప్రయత్నం చేశారు.
also read: హుషారు-2పై ఆసక్తి పెంచుతున్న మేకర్స్.. ఈసారి మరింత ఫన్, మ్యాడ్‌నెస్!