మీరు ATMలో డబ్బులు డ్రా చేయడానికి వెళ్లారు. కార్డు పెట్టారు.. పిన్‌ ఎంటర్‌ చేశారు.. ఎంత మొత్తం కావాలో ఇచ్చారు. చివరికి డబ్బులు మాత్రం బయటకు రాలేదు. కానీ ఫోన్‌ చూస్తే మాత్రం ‘అకౌంట్ డెబిట్‌’ అంటూ మెసేజ్‌ వచ్చింది. ఇలాంటి సమయంలో మీకు టెన్షన్‌ రావడం సహజమే. అసలు డబ్బులు తిరిగి వస్తాయా? బ్యాంకును సంప్రదించాలా? ఏం చేయాలి? అనే ప్రశ్నలు వెంటనే వస్తాయి. అయితే ముందుగా మీరు కంగారు పడాల్సిన అవసరం లేదు. ఇలాంటి విఫలమైన ATM లావాదేవీలకు RBI ప్రత్యేక నిబంధనలు ఉన్నాయి.
ముందుగా ఈ విషయం గుర్తుపెట్టుకోండి..
ATMలో సాంకేతిక సమస్య, నెట్‌వర్క్‌ అంతరాయం, విద్యుత్‌ సమస్య లేదా ఇతర కారణాల వల్ల నగదు బయటకు రాకపోవచ్చు. కానీ అదే సమయంలో మీ ఖాతా నుంచి మొత్తం డెబిట్‌ కావచ్చు. ఇలాంటి లావాదేవీని ‘ఫెయిల్డ్‌ ATM ట్రాన్సాక్షన్‌’గా పరిగణిస్తారు. అందుకే మీ ఖాతా నుంచి డబ్బు కట్ అయిందని చూసి.. ‘నా డబ్బు పోయింది’ అని అనుకోవాల్సిన అవసరం లేదు. RBI నిబంధనల ప్రకారం ఇలాంటి మొత్తాన్ని బ్యాంకు ఆటోమేటిక్‌గా రివర్స్‌ చేయాల్సి ఉంటుంది.
ATM దగ్గరే ఒక పని చేయండి
ఇలాంటి పరిస్థితి ఎదురైన వెంటనే ATM నుంచి వచ్చిన స్లిప్‌ ఉంటే దాన్ని పారేయకుండా భద్రంగా ఉంచండి. అందులో ట్రాన్సాక్షన్‌ వివరాలు ఉంటాయి. ఒకవేళ స్లిప్‌ రాకపోతే మీ మొబైల్‌కు వచ్చిన బ్యాంకు మెసేజ్‌ను డిలీట్‌ చేయకుండా ఉంచడం మంచిది. అవసరమైతే దాని స్క్రీన్‌షాట్‌ తీసి పెట్టుకోండి. ట్రాన్సాక్షన్‌ తేదీ, సమయం, మొత్తం వంటి వివరాలు మీ దగ్గర ఉంటే ఫిర్యాదు చేసేటప్పుడు ఉపయోగపడతాయి.
వెంటనే బ్యాంకుకు సమాచారం ఇవ్వండి
డబ్బులు బయటకు రాకపోయినా ఖాతా నుంచి మొత్తం తగ్గిపోయినట్లు కనిపిస్తే.. మీ బ్యాంకుకు వెంటనే ఫిర్యాదు చేయండి. ATMలో లేదా క్యాబిన్‌లో బ్యాంకు హెల్ప్‌లైన్‌ నంబర్‌ ఉంటే దాని ద్వారా సంప్రదించవచ్చు. అలాగే మీ బ్యాంకు అందించే అధికారిక కస్టమర్‌ కేర్‌ లేదా డిజిటల్‌ ఫిర్యాదు మార్గాలను ఉపయోగించండి. మీ ఫిర్యాదు నమోదు చేసిన తర్వాత దానికి సంబంధించిన నంబర్‌ లేదా రిఫరెన్స్‌ వివరాలను కూడా భద్రపరుచుకోండి. తర్వాత సమస్య పరిష్కారం కాకపోతే అదే వివరాలు ఉపయోగపడతాయి.
ఎన్ని రోజుల్లో డబ్బు తిరిగి రావాలి?
ఇక్కడే అసలు విషయం ఉంది. RBI నిబంధనల ప్రకారం.. ATMలో ఖాతా నుంచి డబ్బు డెబిట్‌ అయినా నగదు అందకపోతే, బ్యాంకు ఆ మొత్తాన్ని గరిష్ఠంగా T+5 రోజుల్లో ఆటో-రివర్స్‌ చేయాలి. అంటే లావాదేవీ జరిగిన రోజు తర్వాత నిర్దేశిత గడువులో మొత్తం తిరిగి ఖాతాలో జమ కావాలి. చాలా సందర్భాల్లో బ్యాంకింగ్‌ సిస్టమ్‌ ద్వారా ఈ మొత్తం స్వయంచాలకంగానే తిరిగి జమ అవుతుంది. అయినా మీరు మీ ఖాతాను చెక్‌ చేస్తూ ఉండటం మంచిది.
ఐదు రోజులు దాటినా డబ్బు రాకపోతే?
ఇక్కడ మీకు మరో ముఖ్యమైన హక్కు ఉంది. RBI నిబంధనల ప్రకారం T+5 గడువు దాటిన తర్వాత కూడా డబ్బు రివర్స్‌ కాకపోతే రోజుకు రూ.100 చొప్పున పరిహారం చెల్లించాల్సి ఉంటుంది. అందుకే ఇలాంటి సమయంలో ‘బ్యాంకు వాళ్లు చూసుకుంటారులే’ అని వదిలేయకుండా.. మీరు చేసిన ఫిర్యాదు వివరాలను జాగ్రత్తగా ఉంచుకోవాలి.
బ్యాంకు పరిష్కరించకపోతే?
ముందుగా మీ బ్యాంకులోనే ఫిర్యాదు చేయండి. సమస్య పరిష్కారం కాకపోతే RBI అందించే ఫిర్యాదు పరిష్కార వ్యవస్థను ఆశ్రయించవచ్చు. బ్యాంకు వద్ద చేసిన ఫిర్యాదు వివరాలు, ట్రాన్సాక్షన్‌ ఆధారాలు, డెబిట్‌ మెసేజ్‌, ATM స్లిప్‌ వంటి వివరాలు మీ దగ్గర ఉంటే ప్రక్రియలో ఉపయోగపడతాయి.కాబట్టి ATM నుంచి డబ్బులు రాకపోయినా అకౌంట్ నుంచి మొత్తం కట్ అయిందని చూసి మీరు భయపడాల్సిన అవసరం లేదు. సాక్ష్యాలు భద్రపరచండి.. వెంటనే బ్యాంకుకు ఫిర్యాదు చేయండి.. మీ ఖాతాను గమనించండి. RBI నిబంధనల ప్రకారం ఫెయిల్ అయిన ATM ట్రాన్సక్షన్ ను రివర్సల్‌, ఆలస్యమైతే పరిహారం పొందే అవకాశం మీకు ఉంది.