క్రైమ్ మిర్రర్,సినిమా:- తమిళ సినీ పరిశ్రమలో అగ్ర కథానాయకుడు దళపతి విజయ్ కుమారుడు జేసన్ సంజయ్ వెండితెర ఎంట్రీ గురించి కోలీవుడ్ వర్గాల్లో ఆసక్తికరమైన చర్చ జరుగుతోంది. ఇప్పటికే మెగాఫోన్ పట్టి దర్శకత్వం వైపు అడుగులు వేసిన జేసన్ సంజయ్, ఇప్పుడు కథానాయకుడిగా ప్రేక్షకులను అలరించేందుకు సిద్ధమవుతున్నట్లు సమాచారం.
గతంలో లైకా ప్రొడక్షన్స్ బ్యానర్‌లో జేసన్ సంజయ్ ఓ చిత్రానికి దర్శకత్వం వహించేందుకు ఒప్పందం కుదుర్చుకున్న సంగతి తెలిసిందే. అయితే ఇప్పుడు అదే ప్రముఖ నిర్మాణ సంస్థ ఆయనను హీరోగా ఇండస్ట్రీకి పరిచయం చేయడానికి వినూత్న ప్రణాళికలు రచిస్తున్నట్లు కోలీవుడ్‌లో వార్తలు ఊపందుకున్నాయి. ఈ ప్రతిష్టాత్మక ప్రాజెక్ట్ కోసం పలువురు ప్రముఖ దర్శకులు జేసన్ సంజయ్ బాడీ లాంగ్వేజ్‌కు తగినట్లుగా విభిన్నమైన కథలను సిద్ధం చేస్తున్నారట.
ఆ కథలలో ఒక బలమైన కథను త్వరలోనే ఫైనలైజ్ చేసి, అంగరంగ వైభవంగా పూజా కార్యక్రమాలతో ఈ సినిమాను ప్రారంభించేందుకు ఏర్పాట్లు జరుగుతున్నాయని టాక్. విజయ్ వారసుడిగా సినీ రంగంలోకి అడుగుపెడుతున్న జేసన్ సంజయ్, నటుడిగా తనదైన ప్రత్యేక ముద్ర వేయాలని భావిస్తున్నారు. ఈ వార్త సోషల్ మీడియాలో వైరల్ అవ్వడంతో దళపతి అభిమానులు హర్షం వ్యక్తం చేస్తున్నారు. త్వరలోనే ఈ క్రేజీ ప్రాజెక్ట్‌పై అధికారిక ప్రకటన వెలువడే అవకాశం ఉంది.