క్రైమ మిర్రర్ : బంగారం, డబ్బు, ఆస్తుల కోసం హత్యలు జరిగిన ఘటనలు చాలానే చూశాం. కానీ కేవలం రూ.20 విలువైన వాటర్ బాటిల్ విషయంలో ఓ వ్యక్తి ప్రాణాలు కోల్పోవడం తీవ్ర కలకలం రేపుతోంది. చిన్న వివాదం కాస్తా హింసాత్మకంగా మారడంతో ఓ కుటుంబానికి తీరని విషాదం మిగిలింది. విజయవాడలో చోటుచేసుకున్న ఈ ఘటన స్థానికంగా సంచలనం సృష్టించింది.
వాటర్ బాటిల్ విషయంలో మొదలైన వివాదం
వివరాల్లోకి వెళ్తే.. నల్గొండ జిల్లాకు చెందిన మాస సాయికుమార్ (33) యాదాద్రి భువనగిరి జిల్లా మోత్కూరులోని ఓ ఫాస్ట్‌ఫుడ్ సెంటర్‌లో పనిచేస్తున్నాడు. ఆయనకు భార్యతో పాటు ఇద్దరు కుమార్తెలు, ఒక కుమారుడు ఉన్నారు. వారం రోజుల క్రితం విశాఖపట్నం వెళ్తున్నానని ఫాస్ట్‌ఫుడ్ సెంటర్ నిర్వాహకులకు చెప్పి అక్కడి నుంచి వెళ్లిపోయాడు. ఈ క్రమంలో ఈ నెల 18వ తేదీ అర్ధరాత్రి దాటిన తర్వాత విజయవాడలోని పటమట ప్రాంతంలో ఉన్న ఓ పాన్‌షాప్ వద్దకు సాయికుమార్ వెళ్లాడు. అక్కడ ఫ్రిజ్‌లో ఉన్న రూ.20 విలువైన వాటర్ బాటిల్ తీసుకునేందుకు ప్రయత్నించినట్లు సమాచారం. అదే సమయంలో అటుగా వచ్చిన పాల సరఫరా వాహనం డ్రైవర్ ఈ విషయాన్ని గమనించాడు. సాయికుమార్‌ను పట్టుకుని పాన్‌షాప్‌లో పనిచేస్తున్న రవిశంకర్‌కు అప్పగించి అక్కడి నుంచి వెళ్లిపోయాడు. దీంతో మొదలైన వివాదం చివరకు తీవ్ర దాడికి దారితీసింది.
నలుగురు కలిసి విచక్షణారహితంగా దాడి
పోలీసుల వివరాల ప్రకారం.. రవిశంకర్‌తో పాటు బార్‌లో పనిచేసే అయ్యప్పశంకర్ సాయికుమార్‌పై దాడికి దిగారు. అతడిని పిడిగుద్దులతో కొడుతూ, నేలపై ఈడ్చుకుంటూ దుకాణం వెనుక ఉన్న సందులోకి తీసుకెళ్లినట్లు తెలుస్తోంది. అదే సమయంలో అక్కడికి వచ్చిన పోతంశెట్టి నవీన్, సాయిప్రణీత్ కూడా దాడిలో పాల్గొన్నట్లు సమాచారం. నలుగురూ కలిసి సాయికుమార్‌ను తీవ్రంగా కొట్టారు. తనకు భార్యాపిల్లలు ఉన్నారని, తనను వదిలేయాలని బాధితుడు వేడుకున్నప్పటికీ వారు కనికరించలేదని ప్రాథమిక వివరాలు సూచిస్తున్నాయి.
విద్యుత్ స్తంభానికి కట్టేసి దాడి
సాయికుమార్ చేతులను వెనక్కి విరిచి విద్యుత్ స్తంభానికి కట్టేసి కర్రలతో తీవ్రంగా కొట్టినట్లు ఆరోపణలు ఉన్నాయి. దాదాపు రెండు గంటలపాటు అతడిని హింసించినట్లు సమాచారం. తీవ్ర గాయాల కారణంగా సాయికుమార్ అక్కడికక్కడే ప్రాణాలు కోల్పోయాడు. ఒక చిన్న వాటర్ బాటిల్ విషయంలో మొదలైన వివాదం ఓ వ్యక్తి ప్రాణాలను బలిగొనడం స్థానికంగా తీవ్ర ఆవేదనకు కారణమైంది. కుటుంబానికి ఆధారంగా ఉన్న వ్యక్తి మరణించడంతో భార్యాపిల్లలు దిక్కుతోచని పరిస్థితిని ఎదుర్కొంటున్నారు.
సీసీటీవీ ఆధారంగా నిందితుల గుర్తింపు
ఘటన అనంతరం నిందితులు అక్కడి నుంచి పారిపోయినట్లు సమాచారం. సాయికుమార్ కుటుంబ సభ్యుల ఫిర్యాదు మేరకు పోలీసులు కేసు నమోదు చేసి దర్యాప్తు ప్రారంభించారు. పరిసర ప్రాంతాల్లోని సీసీటీవీ కెమెరాల దృశ్యాలను పరిశీలించి నిందితులను గుర్తించినట్లు తెలుస్తోంది. ఈ కేసుకు సంబంధించి నలుగురు నిందితులను పోలీసులు అదుపులోకి తీసుకున్నట్లు సమాచారం. ఘటనకు సంబంధించిన పూర్తి వివరాలు, దర్యాప్తులో వెల్లడయ్యే ఇతర అంశాలపై అధికారిక సమాచారం రావాల్సి ఉంది.
also read : సౌదీలో డ్రోన్ దాడి కలకలం.. మృతుల్లో భారతీయుడు!