ఉత్తరప్రదేశ్ రాష్ట్రంలో మరోసారి మానవత్వాన్ని కలిచివేసే దారుణ ఘటన వెలుగులోకి వచ్చింది. ముజఫర్నగర్ జిల్లాలో జరిగిన ఈ హత్యలు స్థానికంగా తీవ్ర కలకలం రేపాయి. కుటుంబ వివాదం నేపథ్యంలో ఫరూఖ్ అనే వ్యక్తి తన భార్య తహిరాతో పాటు ఇద్దరు మైనర్ కుమార్తెలను కాల్చి చంపిన ఘటన ఆలస్యంగా బయటపడింది. డిసెంబర్ 10న ఈ నేరం జరిగిందని, అయితే కొన్ని రోజుల పాటు విషయం బయటకు రాకపోవడం మరింత సంచలనంగా మారింది.
పోలీసుల వివరాల ప్రకారం.. భార్యాభర్తల మధ్య నెలకొన్న తీవ్ర విభేదాలే ఈ ఘోరానికి దారితీసినట్లు ప్రాథమికంగా తేలింది. ఆగ్రహంతో ఊగిపోయిన ఫరూఖ్ ముందుగా తన భార్యను, ఆపై ఇద్దరు చిన్నారులను తుపాకీతో కాల్చి హతమార్చాడు. అంతటితో ఆగకుండా, తాను చేసిన నేరం బయటపడకుండా ఉండేందుకు మృతదేహాలను ఇంట్లోనే పూడ్చిపెట్టినట్లు పోలీసులు గుర్తించారు. ఇంతటి కిరాతకాన్ని ఒక తండ్రి చేయగలిగాడా అనే ప్రశ్నలు స్థానికుల్లో తీవ్ర ఆవేదనను కలిగిస్తున్నాయి.
ఈ ఘటనపై అనుమానం వ్యక్తం చేసిన స్థానికులు పోలీసులకు సమాచారం ఇవ్వడంతో అసలు విషయం వెలుగులోకి వచ్చింది. వెంటనే రంగంలోకి దిగిన పోలీసులు ఇంటిని పరిశీలించగా, పూడ్చిపెట్టిన మృతదేహాలు బయటపడ్డాయి. దీంతో గ్రామం మొత్తం ఒక్కసారిగా ఉలిక్కిపడింది. పోలీసులు నిందితుడు ఫరూఖ్ను అదుపులోకి తీసుకుని విచారణ ప్రారంభించారు.
ఈ విషయం తెలుసుకున్న తహిరా కుటుంబ సభ్యులు, బంధువులు తీవ్ర ఆగ్రహానికి లోనయ్యారు. నిందితుడిపై దాడికి ప్రయత్నించడంతో పరిస్థితి ఉద్రిక్తంగా మారింది. ఎలాంటి అవాంఛనీయ ఘటనలు జరగకుండా పోలీసులు గ్రామంలో భారీగా బలగాలను మోహరించారు. ప్రస్తుతం ముజఫర్నగర్లో భద్రతను కట్టుదిట్టం చేశారు.
పోలీసులు ఈ కేసును అత్యంత సీరియస్గా తీసుకుని దర్యాప్తు చేపట్టారు. హత్యకు ఉపయోగించిన ఆయుధం, కుటుంబ వివాదానికి గల అసలు కారణాలు, గతంలో ఏమైనా ఫిర్యాదులు ఉన్నాయా అనే కోణాల్లో విచారణ కొనసాగుతోంది. చిన్నారుల మృతి దేశవ్యాప్తంగా తీవ్ర దిగ్భ్రాంతిని కలిగించిందని పోలీసు అధికారులు తెలిపారు.
ALSO READ: Gold Prices: బంగారం కొనడానికి ఇంతకన్నా మంచి ఛాన్స్ ఉండదు.. వెళ్లండి.. వెళ్లి వెంటనే కొనేసేయండి!
