క్రైమ్ మిర్రర్, ఆన్ లైన్ డెస్క్ : దేశవ్యాప్తంగా రాజకీయ ప్రకంపనలు సృష్టించిన ఢిల్లీ లిక్కర్ స్కాంలో బీఆర్ఎస్ ఎమ్మెల్సీ కవిత ఈడీ విచారణ కొనసాగుతోంది. ఈ కేసులో ఇప్పటికే అరెస్టై ఈడీ కస్టడీలో ఉన్న రామంచద్ర పిళ్లైతో కలిసి కవితను ఈడీ అధికారులు విచారించారు. కన్‌ఫ్రంటేషన్ పద్దతిలో వీరిద్దరిపై ఈడీ అధికారులు ప్రశ్నల వర్షం కురిపించినట్లు సమాచారం. ఢిల్లీ లిక్కర్ స్కాంలో పాత్ర, నిందితులతో ఉన్న సంబంధాలు, ఇండో స్పిరిట్స్ కంపెనీలో వాటాలు, రూ.100 కోట్ల ముడుపుల వ్యవహారంపై కవితను ఈడీ అధికారులు ప్రశ్నిస్తున్నట్లు సమాచారం. ఇప్పటివరకు ఈ కేసులో కవిత పాత్రపై సేకరించిన ఆధారాలు, సాక్ష్యాలతో ఈడీ అధికారులు ప్రశ్నిస్తున్నారు. మరోవైపు రామచంద్ర పిళ్లై ఈడీ కస్టడీ ముగిసింది. దీంతో ఆయన్ను ఈడీ అధికారులు రౌజ్ అవెన్యూ కోర్టులో హాజరు పరిచారు. ఈ కేసులో పిళ్లై కీలక నిందితుడిగా ఉన్నందున అతడి కస్టడీని పొడగించాలని ఈడీ అధికారులు కోర్టునుకోరారు. దీంతో పిళ్లై జ్యుడీషియల్ రిమాండ్‌ను ఏప్రిల్ 3 వరకు పొడగిస్తూ కోర్టు ఆదేశాలు జారీ చేసింది. ఈ ఉదయం కవిత ఆమె భర్త అనిల్‌తో కలిసి ఈడీ కార్యాలయానికి వచ్చారు. అనిల్‌తో పాటు మంత్రి శ్రీనివాస్ గౌడ్, ఆమె తరపు న్యాయవాది సోమ భరత్ ఈడీ ఆఫీస్‌కు వచ్చారు. కవిత ఈడీ కార్యాలయం లోపలికి వెళ్లగా.. వారు బయటే ఉండిపోయారు. ఈనెల 11న ఆమెను ఈడీ అధికారులు తొలిసారి ప్రశ్నించారు. అనంతరం ఈనెల 16న విచారణకు రావాల్సిందిగా నోటీసులు జారీ చేయగా..ఆమె గైర్హాజరయ్యారు. తనకు జారీ చేసిన సమన్లపై సుప్రీం కోర్టులో పిటిషన్ దాఖలు చేసినట్లు చెప్పిన కవిత.. పిటిషన్ ఈనెల 24కు రానుందని ఇలాంటి సమయంలో విచారణకు రాలేనని చెప్పారు. తన ప్రతినిధిగా న్యాయవాది భరత్‌ను అధికారులు అడిగిన పత్రాలతో ఈడీ కార్యాలయానికి పంపింది. దీంతో ఈనెల 20న విచారణకు రావాలంటూ ఈడీ అధికారులు మరోసారి నోటీసులు జారీ చేశారు. ఈ నేపథ్యంలో ఆమె ఇవాళ విచారణకు హాజరవుతారా ? లేదా అనేదానిపై ఉత్కంఠ నెలకొంది. ఉత్కంఠకు తెరదించుతూ న్యాయనిపుణులతో చర్చించిన అనంతరం ఈమె ఇవాళ ఉదయం ఈడీ విచారణకు హాజరయ్యారు. ప్రస్తుతం ఐదు గంటలకు పైగా ఈడీ విచారణ కొనసాగుతుండగా.. సాయంత్రం 6 గంటల వరకు అధికారులు ఆమెను ప్రశ్నించే అవకాశం ఉంది.
